Амма улууһун ыҥырыаны иитээччилэрэ Мээндигигэ эбии үөрэҕи бардылар. Өрөспүүбүлүкэ биир бастыҥ ыҥырыа иитээччитэ Марат Залялов кэлэн үөрэттэ. Кини улууска ыҥырыаны тарҕатыыга СӨ тыатын хаһаайыстыбатын Гранын былырыын ылбыта. Үөрэххэ хас да саҥа саҕалааччылар кэлэн билиилэрин хаҥаттылар, эбии ыҥырыалаах уйалары атыыластылар.
“Биһиги дьиэ кэргэнинэн ыҥырыанан дьарыктанан эрэбит. Ол курдук бастаан уолбут бу идэҕэ үөрэммитэ. Онтон биһиги кэргэмминээн тыа хаһаайыстыбатын техникумугар үөрэммиппит. Манна биһигини Амма улууһугар рабочай кадрдары бэлэмниир тыа хаһаайыстыбатын техникумун филиалын дириэктэрэ Марфа Егоровна Дмитриева сүбэ-ама буолбута. Бу кэнниттэн бу дьыалаҕа ылсаары бэйэ дьарыктаах буоларга биисинэс былаан суруйан 250000 солкуобай социальнай көмүскэл управлениетыттан ылбыппыт. Маннык бырагыраама баара олус үчүгэй. Бу харчыбытынан ыҥырыаны иитиигэ наадалааҕы атыыласпыппыт. Түгэнинэн туһанан оччолорго социальнай көмүскэл управлениетын салайааччытыгар Саргылана Семеновна Константиноваҕа махтанабыт. Онтон дьиҥ ыҥырыалары тутан-хабан үөрэнэрбитигэр олус улахан өйөбүлү улуус ыҥырыа иитээччилэрин Ассоциациятын бэрэссэдээтэлэ Эльвира Васильевна Пестерева оҥорбута. Кини бэйэтин “Земляничка” диэн базатыгар баҕалаах дьону мунньан маастар-кылаас ыыппыта. Ону кытта өссө Аммаҕа баар филиал базатыгар эмиэ маастар-кылааһы баран билиини ылбыппыт. Мин быйыл биэс уйаны атыыластым. Маны биһиэхэ Марат Рафаилович Залялов аҕалан туттарда. Ону кытта инвентарбытыгар туох тиийбэтин эмиэ эрдэттэн ыйыталаһан барытын аҕалан биэрдэ. Аммабыт мүөтэ күүстээх эмтээҕин, туһалааҕын эрдэттэн билэн, бу дьыалаҕа ылсыбыппыт уонна дьэ салгыы күүскэ дьарыктанабыт”, — диэн саҕалааччы Изабелла Иванова санаатын үллэстэр.
