Мээндигигэ бастакы улуустааҕы мүөттээх ыҥырыаны иитээччилэр бэстибээллэрэ ыытылынна. Бэстибээли олохтоох дьаһалта көҕүлээн тэрийэн улуус хас да нэһилиэгиттэн, ону сэргэ Дьокуускай куораттан, Мэҥэ Хаҥалас улууһуттан тиийэ кэлэн бэрт сэргэх тэрээһин буолла.
Мээндиги нэһилиэгэр бастакы улуустааҕы «Медовый рай» диэн ыҥырыа иитээччилэр бэстибээллэрэ буолла. Бэстибээл сүрүн сыалынан улууска ыҥырыа иитиитин тэнитии, саҥа саҕалыыр дьону үөрэтии, көҕүлээһин буолар. Бу тэрээһин Мээндигигэ ыытыллыбыта мээнэҕэ буолбатах. Ол курдук 2012 сыллаахха Мээндиги оскуолатын базатыгар, Амма улууһугар бастакынан, оччолорго оскуола дириэктэринэн үлэлии сылдьан Тимофеев Афанасий Устинович ыҥырыа иитэн саҕалаабыта. Оскуола бастакы пасекатыгар Данилов Афанасий Софронович үлэлээбитэ. Бу кэмтэн ылата улууска биирдиилээн дьон, урбаанньыттар ыҥырыа иитэн саҕалаабыттара. Билигин улуус үрдүнэн 26 ыал ыҥырыа иитэллэр уонна В.Г.Короленко аатынан Амма 1-кы орто оскуолата ыҥырыа иитиитин саҕалаата. Бэстибээл үөрүүлээх арыллыытыгар Мээндиги нэһилиэгин баһылыга Илья Семенов, нэһилиэк куратора Роман Алексеев, Амма улууһун ыҥырыа иитээччилэрин куратора Марат Залялов, улууска бастакы ыҥырыа иитиитин саҕалааччы Афанасий Тимофеев, улуус бааһынай хаһаайыстыбаларын ассоциациятын бэрэссэдээтэлэ Александра Цыпандина эҕэрдэ тылларын эттилэр. Бэстибээлгэ Соморсун, Бөтүҥ, Амма, Чапчылҕан нэһилиэктэриттэн уонна Дьокуускай куораттан, Мэҥэ-Хаҥалас Наахаратыттан мүөттээх ыҥырыаны иитээччилэр кэлэн кыттыыны ыллылар.
Амма улууһун куратора Марат Залялов, Дьокуускайдааҕы тыа хаһаайыстыбатын техникумун эбии үөрэхтээһин педагога Марфа Дмитриева, Амма улууһун ыҥырыа иитээччилэрин ассоциациятын бэрэссэдээтэлэ Эльвира Пестерева бэйэлэрин үлэлэрин кэпсээтилэр, маастар-кылаастары ыыттылар. Маны тэҥэ Мээндиги орто оскуолатын 7-с кылааһын үөрэнээччитэ Эрсан Софронов дьиэ кэргэнинэн ыҥырыа иитэллэрин туһунан кэпсээбитэ ыалдьыттар сэҥээриилэрин ылла. Мүөттэн боролдууксуйалары атыы-эргиэн быыстапката турда. Эбиэт кэннэ мүөт астыыр сыахха, пасекаҕа сылдьан практическай дьарыктар буоллулар. Түмүккэ «Бастыҥ мүөт» анал ааты Мээндиги эдэр ыалыгар Владислава, Иосиф Софроновтар дьиэ кэргэттэригэр, «Мүөттэн элбэх бородууксуйа» анал ааты Чапчылҕантан Эльвира Пестерева ыллылар. Бэйэлэрин үлэлэрин кэпсээбит, үөрэппит дьоммутугар нэһилиэк, улуус баһылыгын Махтал суруктара туттарыллыннылар.
Кэлбит ыалдьыттары уонна тэрийээччилэри махтанан туран Марат Залялов, Татьяна Яковлева Мээндиги мүөтүнэн күндүлээтилэр. Мэҥэттэн кэлбит ыалдьыттарбытыгар Аксинья, Василий Шестаковтарга Амма улууһун ыҥырыа иитээччилэрин ассоциациялара сэмэй бэлэхтэрин туттардылар уонна куратордарыгар Марат Рафаиловичка саха быһаҕын бэлэхтээтилэр. Бэстибээл кыттыылаахтара ыҥырыа иитиитигэр саҥаны билэн-көрөн, элбэххэ үөрэнэн тарҕастылар.