Амма олохтоохторо Григорьевтар түргэнник ситэр салааны иитиинэн дьарыктаммытара хаһыс да сыла. Индюк, куурусса, перепелка, хаас, мүөттээх ыҥырыа туталларын таһынан козаны элбэтэн эккэ, үүккэ абыраллаах эбит диэн уопуттарыттан кэпсиир кыахтаахтар. Бүгүн козалара үс оҕолонон кырата суох хаһаайыстыбаны өссө хаҥатта.
Тимофей Дмитриевич Григорьев уонна Саргылана Афанасьевна Рожина “Мэҥкэр” хаһаайыстыбаларын аатын Аммаҕа истибэтэх, билбэт дьон суох. Кинилэр ыҥырыаттан бородууксуйалара Москва куоракка быыстапкаҕа биһирэнэн бэл Дойду Президенин үлэһиттэрэ кытта сакаастаан атыылаһан тураллар.
“Мэҥкэрдэр” былырыын тыа хаһаайыстыбатын министиэристибэтин Гранынан туттубут саҥа хотонноругар билигин үлэ үгэнэ. Инкубатордарыгар сыппыт сымыыттара тахсыталааннар чоппууска саҥатынан туолан олоролор, кырачаан көтөр ахсаана күннэтэ эбиллэр. Билиҥҥитэ 200-тэн тахса перепелка, 400-тэн тахса куурусса , 300 индюк таҕыста, ону сэргэ бэйэлэрин кустарын, хаастарын сымыыттара эмиэ субу тахсаары сыталлар. Үчүгэйдик көрөн-истэн, аһатан улаатыннардахха баһаам эт-ас буолар диэн Саргылана Афанасьевна өрүү этэр, хайдах иитэргэ нэһилиэнньэҕэ сүбэлэри биэрэр, үөрэтэр.
Кэнники сылларга аны “Мэҥкэрдэр” козаны иитэннэр бэркэ биһирии сылдьаллар. Бүгүн биир козалара үс оҕоломмутун истэммин хаһаайканы кытта кэпсэтэ сырыттым:
-Коза бэрт түргэнник ситэр буолан наһаа үчүгэй эбит. Биирбит бүгүн үс оҕолонно, иккиспит кулун тутарга төрүүрүн күүтэбит. Онтон күһүн, эбэтэр кыһыары эмиэ төрүөх биэриэхтээхтэр. Этэ даҕаны, үүтэ даҕаны олох оһуобай. Көрүүгэ улаханнык наадыйбаттар, астара бэрт кыра наада, ноһуомнара олох кып-кыра, төрүөҕэ элбэх, аны үүттэрэ иҥэмтиэлээҕэ – барыта табыгастаах. Өссө биир үчүгэйэ баар – биэс ыйынан номнуо сиэххэ сөп, этэ минньигэс, сымнаҕас, олох буруолуу сылдьа сибиэһэй эт буолар. Биһиги атыырдары сиэн иһэбит, тыһыны иитэбит. Ууһатарга анаан икки эрэ атыыр козалаахпыт, онтон биирэ үүттээх боруода, анаан иитэр ферматтан Россия куораттыттан атыылаһан аҕалбыппыт. Боруодата суох көннөрү коза күҥҥэ үстүү лиитэрэ үүтү тааҕы-таах биэрэр. Билигин оҕолоругар эмтэрэрбит таһынан ыамҥа биирдии лиитэрэни ылабыт. Туһатын туһунан киһи төһө баҕарар кэпсиэн сөп. Онон коза диэн кыылы олус биһирээтибит. Ханнык баҕарар ыал иитэн этинэн бэйэтин хааччыныан сөп эбит диэн санааҕа кэллибит,- диэн улахан хаһаайыстыбалаах Григорьевтар-Рожиннар сүбэлииллэр.