Балаҕан ыйын 24 күнүгэр бэлиэтэммит Саха өрөспүүбүлүкэтин урбаанньыттарын күнүн чэрчитинэн, бэҕэһээ Майа сэлиэнньэтигэр улуус урбаанньыттарыгар ананар тэрээһин ыытылынна. Тэрээһини «Бизнес инкубатор», «Мин бизнеһим» киин Мэҥэ Хаҥаластааҕы филиала, улуустааҕы култуура салалатата тэрийэн ыыттылар.
Сахалыы сиэринэн алгысчыт Илгэлээх Испиридиэн сиэр-туом толордо, бар дьонун алгыс түһэрэн алҕаата. Дьокуускай куораттан «Түмэр Активити» хампаанньа бэрэстэбиитэллэрэ кэлэннэр тимбилдинг, ол эбэтэр урбаанньыттарбытын түмэр оонньуу оонньоттулар. Ыытааччылар бастакы сырыыттан механизм табыллыбытын сөҕө бэлиэтээтилэр.
Күн иккис аҥарыгар Д. Ходулов аатынан норуот айымньытын дьиэтигэр олохтоох оҥорон таһаарар эйгэ быыстапкалара турда, фуршет тэрилиннэ.
Р. Васильев аатынан кыраайы үөрэтэр түмэл дириэктэрин эбээһинэһин толорооччу Михаил Масаха дискуссия былаһааккатын Г. Никифоров – Манньыаттаах уолун туһунан кэпсээниттэн иилээн-саҕалаан ыытта.
Урбаан араас эйгэтиттэн баай уопуттаах спикердар бэйэлэрин үлэлэрин туһунан сырдаттылар. Ол курдук:
-«Мегинострой» тэрилтэ кылаабынай инженера Кирилл Тастыгин тутуу эйгэтин,
-«Эльвира» ХЭТ генеральнай дириэктэрэ Мансур Мубаракшин атыы-эргиэн эйгэтин,
-Биир биллэр-көстөр киэҥ далааһыннаах үлэни ыытар урбаанньыт Иван Борисов айан суолугар аһы-үөлү атыылааһыны, өҥөнү олохтооһуну,
-«Хоту» кэпэрэтиип технолога Надежда Федотова тыа хаһаайыстыбатын бородууксуйатын оҥорон таһаарыы,
-«Солнечный берег» турбаза хаһаайката Анисия Васильева туризм эйгэтин,
-Сип панелларынан дьарыктанар урбаанньыт Ариан Мохначевский тутуу матырыйаалларын оҥорон таһаарыыны ырдаттылар.
-Маркетолог Николь Егорова урбааҥҥа маркетин хайдах дьайарын туһунан кэпсээтэ. Мустубут урбаанньыттар, бизнеска интэриэстээх, холонон көрүөн баҕалаахтар интэриэһиргиир боппуруостарын биэрдилэр.
Тэрээһин үөрүүлээх чааһыгар улуус баһылыгын социальнай уонна имиджевай бэлиитикэҕэ солбуйааччы Альбина Григорьева, Бизнес инкубатор салайааччыта Сергей Сергучев бар дьоннорун эҕэрдэлээн тураннар СӨ предпринимательстватын, атыы-эргиэн, туризм министиэристибэтиттэн бочуоттаах грамоталары, махтал суруктары, улуус баһылыгын аатыттан түөскэ кэтиллэр бэлиэлэри, махтал суруктары туттардылар.
Бу курдук улууспутугар урбаан күнэ киэн далааһыннаахтык ыытылынна. Инникитин бары урбаанньыттарбытын көзтөөх кыттыыны ыларгытыгар ыҥырабыт.