Үөһээ Бүлүүбүт күнтэн күн киэркэйэр. Биир-биир ураты көстүүлээх маҕаһыыннар эбиллэн улууспут киинин тупсараллар. Бу күннэргэ федеральнай трасса суолугар «УУУ» диэн нүөмэрдээх, бодобуос курдук көстүүлээх дьоҕус маҕаһыын арыллан дьону-сэргэни соһутта. Манна ыраас ууну атыылыыллар эбит, киһи астынара диэн, ууну ылаары массыынаттан тахсан испэккэ, иһиттээх ууну таспакка эрэ массыына түннүгүн нөҥүө ууну шланганан куттарыахха сөп эбит.

Дьоҥҥо туһалаах ларегу предприниматель Роман Ильин арыйда. Кини дьону таһар өҥөнөн дьарыктанар, сайын паром үлэлэтэр, саас уонна күһүн аэроборт (ирбис) сырыытынан олохтоохтору хааччыйар. Роман Анатольевич Кэлтэгэй эбэ үрдүгэр төрөөбүт-үөскээбит буолан, эбэҕэ олус махталлаах сыһыаннаах, оннук да курдук Бүлүү эбэҕэ үлэлии-хамсыы сырыттаҕа. Урут-уруккуттан биир дойдулаахтарын ыраас уунан хааччыйар баҕа санаалаах эбит. Ол ыра санаатын олоххо киллэрбититтэн олус астынар, бэйэтэ этэринэн: «Мин дьоҥҥо өҥөнү оҥорор предприниматель буоларым быһыытынан, дьоҥҥо туһалыы сатыыбын, иһиттээх ыарахан ууну таспатыннар диэн кыратык да олохторун чэпчэтэбин».

— Лареккут олус интэриэһинэй көстүүлээх, маннык идиэйэ хантан кэлбитэй?

— Тоҕо ларек барыта биир көстүүлээҕий диэн толкуйдуур этим. Арыый да ураты гыныахха сөп этэ диэн санааттан, ууну ыраастыырбыт, атыылыырбыт быһыытынан, бодобуос пуорматыгар тохтообуппут. Ааһан иһэр киһи көрөн баран «Чахчы бу уу тэрилтэтэ турар эбит» диэн толкуйдуохтаах.

— Ууну иһигэр ыраастыыгыт дуо?

— Оннук, ларек иһигэр ыраастыыр носуос турар, анал  профессиональнай аппаратураны таҥан туруордубут. Үлэлиир киһи хаачыстыбалаахтык үлэлиэхтээх дии саныыбын, онон аппаратурабыт аныгы, сыаналаах, үс түһүмэҕинэн ууну ыраастыыр. Маны таһынан, 6 кубтаах уу иһиттэрэ тураллар.

— Ууну хантан баһаҕыт?

— Өрүстэн, бэйэбит чааһынай бодобуоспут таһар.

— «Ыраас ууну» үлэлэтэргэр предпримательство министиэристибэтиттэн көмө туһанныҥ дуо?

— Суох, бэйэбит күүспүтүнэн үлэлэтэбит. Иэс киирбэт буола сатыыбын. Биһиги, 70-с сыллар оҕолоро, иитиибит оннук буолуо, кимтэн да, тугу да кэтэспэккэ, барытын бэйэбит үлэлэтэ сатыыбыт. Мин үлэбэр кэргэним күүс-көмө буолар.

— Хас үлэһиттээххиний?

— Сайын паромҥа үлэлиир уолаттарым үлэлии сылдьаллар. Бары ыал аҕалара, онон кинилэри үлэлээх гынарга кыһаллабын, бары өйөһөн-өйөнсөн сылдьабыт.

— Бу арыйбыт лареккут ааттаах дуо? Кэпсэтэрбит тухары «ларек» эрэ диэн ааттаатыбыт.

— Дьэ, аатын толкуйдуу сылдьабыт. «Ыраас уу» диирбит дуу… Эмиэ да федеральнай трасса суолугар турар буоламмыт, нууччалыы ааттанарбыт наада курдук.

— Миэстэтигэр бутыль атыылыыгыт дуо?

— Суох, биһиэхэ бэйэҕит иһиккитин илдьэ кэлэҕит. Бутыль да буолбакка, бөдүөннээх, улахан иһиттээх да кэлэн уу ылыахтарын сөп.

— Инники былааҥҥыт?

— Бу үлэ саҕаланыыта эрэ. Өссө да бырайыак элбэх. Доруобуйа эрэ баар буоллун.

Бу курдук саҥа арыллыбыт ууну ыраастыыр, атыылыыр ларек үлэһиттэрэ клиеҥҥэ бары өттүнэн табыгастаах буоллун диэн үлэлэрин саҕалаатылар. «Бастакы үлэ күнүгэр 10-ча киһи сырытта», — диэн Роман Анатольевич кэпсээтэ. Мантан сиэттэрэн клиент өссө элбээтин, махталлаах клиент биир оннук буоллун диэн баҕарыаҕыҥ.

Мария Васильева,

Корреспондент РГ «Верхневилюйск»