Аччыгый уонна орто биисинэһи сайыннарыы бырагыраама чэрчитинэн, Маар Күөл нэһилиэгин ыччаттара нэһилиэк бүддьүөтүттэн үп ылан, ынах сүөһү иитиинэн дьарыктаналлар.

Ол туһунан Маар Күөл олохтооҕо Валентина Слепцова маннык кэпсээтэ:

— Нэһилиэкпитигэр сүөһү ииттэр баҕалаах икки эдэр уол бэйэлэрин кыахтарынан, үптэринэн саҥа хотон туттаннар, сүөһү иитиитинэн дьарыктанан эрэллэр.

Ол курдук, Петр Емельянов билиҥҥи кэмҥэ тыа сиригэр бэйэ сүөһүлээх эрэ киһи үчүгэйдик олорор кыахтааҕын өйдөөн, тыа хаһаайыстыбатыгар ИП тэринэргэ санаммыта. Кини баҕатын өйөөн, олохтоох дьаһалта аччыгый уонна орто биисинэс сайдыытын бырагырааматын чэрчитинэн 300.000 солк.харчынан көмөлөспүтэ. Бу харчынан Петр Афанасьевич Аллыҥаттан 5 ынаҕы атыыласпыта. Эбии бэйэтин харчытынан Новайтан 10 тарбыйаҕы, Таас Үрэхтэн сүөһү боруодатын тупсарар, мраморнай эттээх, хойуу үүттээх саха ынаҕын үөскэтэр сыаллаах саха оҕуһун атыыласпыта. 20 төбөҕө аналлаах хотон туттан үлэлии-хамсыы сылдьар. Билигин 4 ынаҕы ыыр. «Бэйэ сүөһүтүн этэ, үүтэ, сүөгэйэ, арыыта үчүгэйэ бэрт» — диир Петр Емельянов. Инникитин ынахтара, бургунастара төрөөн, сүөһүтүн ахсаана элбээтэҕинэ, өссө улахан хотон туттар баҕа санаалаах.

Оттон баара-суоҕа 30 саастаах Юрий Михайлов ийэлээх аҕата үйэлэрин тухары иитэн муспут сүөһүлэрин салҕыы иитэн илдьэ бараары эмиэ ИП буолла. 50 төбөҕө аналлаах хотону дьиэ кэргэн бары саба түһэн түргэн кэминэн тутан бүтэрдилэр. Хотон иһигэр ынахтар, субайдар, ньирэйдэр бары аналлаах турар миэстэлээхтэр. Эдэр киһи бэйэ дьыалатын тэринэригэр олохтоох дьаһалта 200.000 солкуобайы көмөлөстө».

Инникини өтө көрөн, сүөһү ииттэр эдэр дьоҥҥо ситиһиилэри эрэ баҕарабыт.

Подробнее: https://ulus.media/article/31076