Амма улууһун баһылыга Степан Кузьмин мүөттээх ыҥырыаны иитиинэн дьарыктанар, дьону түмэр, үлэлэрин сүрүннүүр улуустааҕы Ассоциация бэрэссэдээтэлэ Эльвира Пестереваны уонна бу дьыалаҕа улахан уопуттаах, аммаларга куратор Марат Заляловы кытта көрүстэ.
Бу көрсүһүүгэ баһылыкка үлэ-хамнас уонна баар кыһалҕалары билиһиннэрдилэр. Марат Рафаилович быйыл ыытыллыбыт мүөттээх ыҥырыаны сайыннарар хаһаайыстыбаларга анаммыт субсидия көрүүтүн күрэҕэр Амма улууһун аатыттан кыттан, кыайыылаах тахсан 5 мөл. солк. субсидияны ылбыта. Кини бу субсидия көмөтүнэн ыҥырыалар боруодаларын тупсарыыга үлэлэһиэхтээх. Онон улууска улахан үлэ ыытыллыа.
«Баһылыгы кытта инники былааны дьүүллэстибит. Манна даҕатан эттэххэ, салалта биһигини өйүүр, күүс-көмө буолар диэн этиэххэ наада. Бу көрсүһүүгэ биһиги Степан Николаевыһы кытта кэпсэтии түмүгэр инники биэс сылга мүөттээх ыҥырыанан дьарыктаныы бырагырааматын оҥостор буоллубут. Санатан эттэххэ өрөспүүбүлүкэҕэ регистрацияламмыт биһиги эрэ улууспутугар “ Пчеловоды Амги” диэн НКО баар”, — диэн Эльвира Пестерева сырдатта.
Бааһынай хаһаайыстыба үтүө санаа аахсыйатыгар алтыс сылын кыттыһар
Амма улууһун биир бастыҥ бааһынайа Александр Фомин сыллата «Арассыыйа ийэлэрэ» уопсастыбаннай хамсааһын ыытар аахсыйаларыгар үтүө санаатынан кыттар, кыаммат араҥаны бэйэтэ үүннэрэр хортуоппуйунан хааччыйар.
Бу салаа ыытар үлэтин биир сүрүн хайысхатынан нэһилиэнньэ көмөҕө наадыйар араҥатыгар өйөбүл буолуу. Ол курдук «Твори добро» бырайыак биир аахсыйатынан «Корзина добра» диэн буолар. Бу аахсыйаҕа бэйэтэ үтүө сүрэҕинэн, сайаҕас санаатынан салайтаран, Сэргэ Бэскэ өр сылларга дьону иккис килиэбинэн, хортуоппуйунан хааччыйа олорор Александр Фомин баһылыктаах «Фомин А.К» бааһынай хаһаайыстыба алтыс сылын кыттар, дьоҥҥо өйөбүл буолар. Ол курдук, бу күннэргэ тэрилтэ үлэһиттэрэ Василий Максимов, Дьулустан Стручков Сэргэ Бэстэн 30 куул хортуоппуйу аҕаланнар 30 ыалга түҥэтэн үөрүүнү аҕаллылар.
«Уолаттар маннык үлэҕэ үөрүйэх, сахалыы сайаҕас тыллаах- өстөөх буолан үөрэ-көтө, үтүөнү саҕа үлэлэрин толорбуттарыттан бэйэбит да астынныбыт уонна тэрилтэ салайааччытыгар Александр Константиновичка, кини кэргэнигэр Анна Николаевнаҕа, үлэһиттэригэр Василийга, Дьулустааҥҥа «Арассыыйа ийэлэрэ» Амматааҕы салаатын, нэһилиэнньэҕэ биир кэлим социальнай көмөнү оҥорор киин дьиэ кэргэҥҥэ уонна оҕолорго социальнай көмөнү оҥорор салаатын үлэһиттэрин аатыттан барҕа махталбытын тириэрдэбит! Инникитин үлэҕитигэр ситиһиини, чэгиэн доруобуйаны баҕарабыт», — диэн «Арассыыйа ийэлэрэ» хамсааһын Амматааҕы салаатын чилиэнэ Матрена Карманова сырдатар.
Үлэ сылыгар «Мин биисинэһим» киин өрөспүүбүлүкэ экономикатын сайдыытыгар бэйэ кылааттаах урбаанньыттар үлэлэрин-хамнастарын туһунан сырдатар. Биһиги урбаанньыттарбыт туруу үлэһиттэр буолалларын уопсастыба сыаналыыр уонна биһириир.
«Дьоҕус уонна орто урбаан» национальнай бырайыак чэрчитинэн «Мин биисинэһим» киин нөҥүө урбаанньыттарга киэҥ хабааннаах араас өҥө көрүллэр. Бу туһунан ыйыллыбыт сигэнэн киирэн ааҕыахха сөп – Мойбизнес14.рф
ГАУ РС(Я) «Центр «Мой бизнес»