Айталина Томская Бүлүү улууһун Кыадаҥдатыгар улууска бастакынан кыһыҥҥы тэпилииссэҕэ элбэх сыллаах бөдөҥ астаах дьэдьэни (клубника) үүннэриини саҕалаабыта.
Кыһыҥҥы тэпилииссэҕэ сылдьан үлэни билсибит дьон, Айталина Томская улууска ким да ылсыбатах дьыалатын саҕалаабытыттан, бэйэтэ кыратын, хатыҥырын үрдүнэн модун, туохтан да чаҕыйбат санаалааҕыттан сөҕөллөр-махтайаллар, ис санааларыттан үтүө саҕалааһын үчүгэй түмүктээх буоларыгар баҕараллар.
Айталина Томская тыа хаһаайыстыбатын биир уустук – үүнээйини үүннэрии салаатыгар ылсарыгар Бүлүү куоратыгар дьиэтин тиэргэнигэр оҕуоруот аһын эгэлгэтин үүннэрэрэ, өссө кыһыҥҥы тэпилииссэтиттэн эрдэ үүнүүнү хомуйара тирэх буолбута чуолкай. Айталина оҕуруот аһын үүннэриигэ бэйэтин билиитигэр-көрүүтүгэр эрэнэрин, чугас дьонун, кэргэнин аймахтарын көмөлөрүн ахтыахха сөп.
Бастаан, Кыадаҥда бааһыналарыгар хортуоппуй, оҕуруот аһын олордуунан дьарыктаммыттар. Онтон элбэх сыллаах бөдөҥ астаах дьэдьэн үүннэрээри бөһүөлэк кытыытыгар быраҕыллан турбут аарка гараас каркаһын туһанан, таһыттан поликарбонатынан бүрүйтэрэн, иһиттэн тэпилииссэ бүрүөһүнүнэн тутан оҥорторбута, оҥорсубута.
Айталина Томская кыһыҥҥы тэпилииссэнэн дьарыктанарыгар саҥа саҕалааччы фермер граныгар – син балачча үптээх-харчылаах “Агростартапка” кыайбыта, улуус 900 тыһ. солк. үбүнэн көмөлөспүтэ, эбии 500 тыһ. солк. суумалаах улуустааҕы куонкуруска кыайбыта олук буоллаҕа.
Үтүө саҕалааһыны Чочу нэһилиэгин дьаһалтата, баһылык Петр Догоюсов өйөөн, күүс-көмө буолбут. Быраҕыллыбыт гарааһы урбаанньыкка биэрэн, кини аатыгар көһөрөн, докумуон оҥоруутугар, тутуутугар, коммуникация киириитигэр өйөөбүттэр.
Кыһыҥҥы тэпилииссэттэн төһө үүнүүнү ылбыттарын, үүнээйилэрин быйыл хайдах кыстаппыттарын, туох “кистэлэҥнэр” баалларын, инники былааннаарын сиһилии “Олох суола” хаһыакка ааҕыҥ.
Николай КУПРИЯНОВ