Эбээн Бытантай улууһун Кустуур нэһилиэгэр мини-бэкээринэ үлэтин саҕалаата. Нэһилиэккэ урбаан саҥа эйгэтигэр олохтоох киһи Прокопий Стручков ылсан, килиэп, бурдук ас арааһын атыылаан дьарыктанан эрэр.

Килиэп буһарыыта диэн нэһилиэнньэҕэ саамай наадалаах өҥө буоларынан бу хайысханы өйөөн Кустуур нэһилиэгин олохтоох дьаһалтата саҥа саҕалаан эрэр урбаанньыкка килиэп буһарар тэрилин атыылаһан, Дьокуускай куораттан тиэйтэрэн аҕалбыта уонна бастакы саҕалыырыгар диэн бурдук биэрбитэ.

Көмөҕө тиксибит урбаанньыт Прокопий Васильевич үөрэ-көтө ылсан, нэһилиэнньэ өр күүппүт сибиэһэй килиэбэ буһан, дьон-сэргэ үөрүүтэ үгүс. Эбиитин от үлэтин кэмэ кэлэн, отчуттар тыаҕа баралларыгар хамаҕатык атыылаһаллар.

Килиэп атыылааччы Марианна Другина ас астааһыҥҥа үгүс уопуттаах буолан буһарбыт килиэбэ олус бэртээхэйин олохтоохтор хайҕаатылар. Маҥнайгы уон килиэби уонна ватрушкалары бастакы атыылаһааччылар босхо ылан үөрдүлэр.