СӨ Урбаан, атыы-эргиэн уонна туризм Министиэристибэтин иһинэн үлэлиир “Мин бизнеһим” киин дьиэтигэр “Молодой предприниматель-2021” диэн Россиятааҕы бырайыак көмүскээһинин регионнааҕы этааба түмүктэннэ. Бу куоҥкурус сүрүн сыала — бастыҥ бырайыактаах эдэр урбаанньыттары өйөөһүн, сүбэ, көмө, буолуу.

Манна үгүс эдэр дьон кытынна. Урбаан эйгэтигэр саҥа үктэнэн эрэр эдэр эрчимнээх дьон бэйэлэрин бырайыактарын көмүскээтилэр. Экспертарынан дьүүллүүр сүбэҕэ «Улыбка» оҕону сайыннарар киинтэн Валентина Старцева, «SOUVENIR YAKUTSK» төрүттэһээччитэ, «Северная сказка» мастарыскыай хаһаайката Сардана Сукулова, «Food-мания» уонна «Food-stop» кафелар хаһаайкалара Лена Дмитриева, «СахаЭкспоСервис» ХЭТ дириэктэрэ  Евгения Сесина, «Фаворит-96» ХЭТ дириэктэрэ, «Fast force» акселерационной программа выпускнига Елена Рожина үлэлээн түөрт номинацияҕа бастыҥнары таллылар.

Ол курдук, республикаҕа бастыҥ эдэр саҕалааччы урбаанньыттар кэккэлэригэр, “Самозанятые” диэн номинацияҕа биһиги биир дойдулаахпыт, улуустааҕы гимназия үөрэнээччитэ ”MiniZoo” хаһаайката Яна Данилова киирдэ. Билэрбит курдук, быйыл эдэркээн Яна улууспутугар урбаан биир сонун хайысханы үлэлэтэн саҕалаабыта. Ол курдук, кини дьиэтин тиэргэнигэр контактнай мини-зоопарка арыйан, оҕолорго, кырачааннарга үгүс үөрүүнү бэлэхтээтэ.

Яна инникитин даҕаны бу саҕалааһынын сайыннарар, кэҥэтэр былааннаах. Онон киниэхэ өссө да үрдүк ситиһиилэри, былааннара барыта олоххо киирэригэр баҕарыаҕыҥ.

Подробнее: https://ulus.media/article/23412