Ахсынньы 10 күнүгэр Кэбээйи нэһилиэгэр улууска бастакы убойнай былаһаакка үлэҕэ киириитин үөрүүлээх, долгутуулаах күнэ буолан ааста. Бу үлэ туһунан сиһилии кэпсиир буоллахха, Софья Кобякова салайааччылаах «Томтор» ТХПК 2022 сыллаахха саас Тыа хаһаайыстыбатын министиэристибэтин граныгар кыттан, 6 мөл 129 тыһ солкуобайдаах граны ылбыта.
«Улуус дьаһалтатыттан 1,5 мөлүйүөн эбии үбүлээһин оҥоһуллан, бэйэ үбүттэн 2 мөлүйүөн солкуобай угуллан ДиПиПром хампаанньа собуотун кытары дуогабардаһан, Москуба уобалаһын Владимирскай оройуонун Александровка куоратыттан убойнай былаһаакка атыыласпыппыт. Бу барыта 10508 тыһыынча солкуобайга тэҥнэстэ. Дуогабарга тутуута уонна Кэбээйигэ диэри аҕалыыта киирдэ. ДиПиПром алтынньы 18 күнүгэр убойнай былаһаакканы бүтэрэн Кэбээйигэ тиэйэн аҕалбыта. Тутуһуу актатыгар комплектациятын уонна миэстэтигэр таҥыыга Иннокентий Попов улахан күүс көмө буолла. Иннокентий Дмитриевич урут Тыа хаһаайыстыбатын уонна ас-үөл бэлиитикэтин министиэристибэтигэр өр сылларга технологынан үлэлээбитэ, өрөспүүбүлүкэҕэ элбэх убойнай сыаҕы үлэҕэ киллэрбит маастар. Үлэтин быыһыгар кэлэн Иннокентий Боескоровтыын аҕыйах күн иһигэр таҥан, былаһаакканы туруоран үлэни түргэтэттилэр», — диэн тоһоҕолоон бэлиэтиир Софья Николаевна кэпсиир.
Былаһааккаҕа эбии салҕааһын дьиэ тутуллубут. Манна үлэһиттэр таҥастарын уларытталлар уонна уу кутуллар емкоһа турбут. Электричествота табыллыбакка дизельнай генератор 30 кВт туруоруллубут.
Үлэ-хамнас, тэрээһин үлэлэрин кылгастык кэпсээтэххэ итинник.
Былаһаакка аһыллыытын үөрүүлээх чааһыгар социальнай боппуруостарга улуус баһылыгын солбуйааччы Александр Сусоев, улуус үөрэхтээһинин начальнига Ирина Неустроева, улууска Тыа хаһаайыстыбатын управлениетын салайааччыта Татьяна Дьяконова, Тыа хаһаайыстыбатын уонна ас-үөл бэлиитикэтин министиэристибэтин бэрэстэбиитэлэ Иннокентий Попов, Кэбээйи нэһилиэгин баһылыга Андрей Кобяков, Кэбээйи нэһилиэгэр баһылык солбуйааччыта Михаил Софронеев, нэһилиэк бэтэрээннэрин сэбиэтин бэрэсэдээтэлэ Егор Павлов, тэрилтэлэр, бааһынай хаһаайыстыба салайааччылара уо.д.а. ыалдьыттар кыттыыны ыллылар.
Тэрээһиҥҥэ «Кэбээйи нэһилиэгин социальнай-экономическай сайдыытыгар кылаатын иһин» түөскэ кэтэр бэлиэни Иннокентий Поповка үөрүүлээх быһыыга-майгыга туттардылар. Маны сэргэ «Кэбээйи улууһун 85 сыла» үбүлүөйүнэй түөскэ кэтэр бэлиэлэрин убойнай былаһаакка тутуутугар үлэлээбит нэһилиэк чулуу үлэһит олохтоохторугар Егор Эверстовка, Иван Дьяконовка, Дмитрий Ивановка туттартаатылар.
Улуус дьаһалтата «Томтор» кооперативка «КАБАРЕ» маҕаһыынтан үлэҕэ туттуллар тэрили ылынаргар диэн 50000 солкуобай суумалаах сертификат туттарда. Аксиния Левина салайааччылаах «Ворошилов» бааһынай хаһаайыстыба уонна урбаанньыт Андрей Левин 10000 солкуобай, урбаанньыт Домна Ефимова 2000 солкуобай суумалаах сертификаттары бэлэхтээтилэр.
Софья Кобякова бэриллибит сертификаттарга эбэн, эт эрбэтэр тэрили ылар уонна үүнэр сылга дьоҕус оҥорон таһаарар сыаҕы үлэҕэ киллэрэн, олохтоох эттэн полуфабрикаттары оҥорон атыыга таһаарар былааннааҕын биллэрдэ.