Нам улууһун Хатыҥ Арыы нэһилиэгин Аппаанытыгар «Тыа сирин бигэ туруктаахтык сайыннарыы» федеральнай программа чэрчитинэн «Озернай» квартал олоххо киирбитэ номнуо 8-с сылыгар барда.
Манна 455 учаастак түҥэтиллэн, уот, күөх төлөн, уу ситимэ тардыллан, инженернэй инфраструктура оҥоһуллан, саҥа дьиэлэр дьэндэһэн көрүөхтэн үчүгэй квартал буолла. Дьон алаһа дьиэлэрин күргүөмнээхтик туттан, ньир бааччы олохсуйан, квартал сыалай биир нэһилиэк курдук кэҥээтэ, улаатта. Сыллата үөрэхтэрин саҥа бүтэрэн тыа сиригэр үлэлии кэлэр эдэр специалистар үлэлииллэригэр, оҕо-уруу төрөтөн олохсуйалларыгар улахан олук уурулунна.
Олохтоохтор сүрүн кыһалҕаларынан маҕаһыын буолар. Онуоха ааспыт сыл муус устарыттан ИП Нюкянова Оксана Николаевна кыра маҕаһыын аһан, олохтоохтору абыраата. Бородуукталара сибиэһэйтэн сибиэһэй, хаһаайыстыбаннай табаарын арааһа элбэх, аны дьиэҕэ тиксэрэн биэрэр өҥөнү оҥорон, дьон махталын ыллылар.
Соҕотох олорор кырдьаҕастар, доруобуйаларынан хааччахтаах, сатаан барбат-кэлбэт дьон кинилэр өҥөлөрүнэн элбэхтик туһаналлар. Ас-үөл сакаастаатахтарына, босхо аҕалан биэрэллэр. Кыһын иһэр муустарын босхо тиэйэн аҕалан, дьон махталын ылаллар. Билиҥҥи ыарахан кэмҥэ маннык үтүө мааны эдэр ыал баарыттан киһи үөрэр.
“Маҕаһыыҥҥа киһи наадыйар аһа барыта атыыланар, ватсап группаларыгар тутатына сырдатан, биллэрэн иһэллэр, тугу наадыйаргын ыйыталастахха хаһан баҕарар эппиэттииллэр, аҕалан биэрэллэр, ” – диэн олохтоохтор үөрүүлэрин биллэрэллэр.
Бу сааскыттан Оксана Николаевналаах дьон-сэргэ сылдьарыгар табыгастаах сиргэ бородууктаны таһынан, тутуу матырыйаалын, таҥас-сап атыылыыр киэҥ-куоҥ маҕаһыын туттан эрэллэр.
Эдэр ыалга нэһилиэнньэ туһугар үлэлэрин иһин улахан махтал, өссө да сайда, кэҥии турдуннар!