Амма улууһун тыатын хаһаайыстыбатын управлениетын салайааччыта Ион Кононов Москуба куоракка Бүтүн Арассыыйатааҕы ас –үөл быыстапкатыгар Саха сирин дэлэгээссийэтин кытынна. Кини дойдубут тэбэр сүрэҕиттэн улуус бары тыа хаһаайыстыбатын эйгэтигэр үлэлии сылдьар дьонун идэлээх күннэринэн истиҥ эҕэрдэтин ыытар.
“Бары убаастыыр кэллиэгэлэрбин идэлээх күҥҥүтүнэн истиҥник эҕэрдэлиибин! Күн -дьыл уларыйар, тэтимэ үрдүүр, саҥа технология, ирдэбил киирэ турар, ол гынан баран аан дойдуга ыраас, бэйэ оҥорбут бородууксуйата сыаналааҕа, суолталааҕа күүһүрэн иһэр. Сыллата айылҕабыт араас көстүүлэрэ мэһэйдэри үөскэтэрин аахсыбакка, күннэри — түүннэри көлөһүннэрин биэрэр тыа
хаһаайыстыбатын бары салаатыгар үлэлиир биир дойдулаахтарбытыгар махтанабыт, сүгүрүйэбит! Хайа да кэмҥэ үлэҕит — хамнаскыт сыаналаннын, бочуоттаах буоллун, кытаанах доруобуйаны, этэҥҥэ кыстыгы, тус олоххо дьолу — соргуну баҕарабын! Биһиги Сахабыт сирэ быйылгы өрөспүүбүлүкэбит 100 сыллааҕар үбүлүөйүгэр олус ситиһиилээхтик кытынна. Ол курдук 100-тэн тахса кыһыл көмүс мэтээли ылла. Ол иһигэр биһиги улуус 3 кыһыл көмүс мэтээли ылан, бэйэбит кылааппытын киллэрэн үөрүүбүт улахан. Элбэх көрсүһүүлэр, тэрээһиннэр, семинардар буоллулар. Инники үлэбитигэр үгүһү биллибит. Улууспут сүөһүтүн кыстыгар толору астаах киирдэ диэххэ сөп. Ол курдук окко былааммытын 97, бурдукка 85 бырыһыан толордубут, эбии аһылык былааннара бары туоллулар, өссө аһары бардылар. Онон сүөһү, сылгы сөптөөх нуорма астара бэлэмнэнилиннэ. Бурдук былаана төһө да туолбатар эбиэс бурдук, комбикорм атыыга баар буолуо. Билэргит курдук быйыл биһиги улуус ыһыытын барытын бэйэтин сиэмэ бурдугунан ыспыта. Онон кураан дьылга куһаҕана суох үүнүү кэллэ диэн сыаналыыбыт. Ону сэргэ оҕуруот аһын былаана эмиэ быйылгы курдук кураан дьылга туолла.
Бу барыта тыа хаһаайыстыбатын туруу үлэһиттэрин күүһүнэн оҥоһуллар. Кинилэр баар буоланнар биһиги остуолбутугар күннэтэ сибиэһэй бородууксуйа баар. Онон өссө төгүл идэлээх күммүтүнэн сылаас эҕэрдэбитин тириэрдэбин, туруктаах олоҕу, этэҥҥэ кыстыкпыт ааһарыгар, чэгиэн доруобуйаны баҕарабын”, -диэн Ион Семенович санаатын тириэртэ.