Намнааҕы “Мой Бизнес” салайааччыта Марфа Тарабукина нэһилиэнньэни кытта көрсөн урбаан тула кэпсэтиитэ, сүбэ-ама биэриитэ салҕанар. Ол курдук, Марфа Семеновна Модут уонна Хатырык нэһилиэгэр сырытта.
Улууспут нэһилиэктэрин дьоно-сэргэтэ ордук тыа хаһаайыстыбатыгар сөптөөҕү, туох көмөлөр баалларын ыйыталлар эбит. Дьоҕус хаһаайыстыбалаах киһи оҥорон таһаарар бородууктатын сөптөөх сыанаҕа уонна элбэх киһиэхэ атыылаабата өйдөнөр. Эбии хаачыстыбаны ирдиир хааччахтарга, докумуоннарга, нолуоктарга иҥнэллэр.
Хаһаайыстыбалаахтар “Агротуризм” диэҥҥэ ылсаллара хайдаҕа эбитэ буолла. Манна кинилэр нэһилиэк олоҕун интэриэһэргээччилэри күнүнэн эбэтэр хонукка аҕалан бэйэлэрин хаһаайыстыбаларын көрдөрүөхтэрин, кэпсээн билиһиннэриэхтэрин сөп. Ону тэҥэ, саҥа саҕалааччыларга “Агростартап” көмө буолуон сөп. Төһөтүн да иһин, тыа хаһаайыстыбанан дьарыктанар чэпчэкитэ суох.
Бүгүҥҥү күҥҥэ үүт туттарыыта сытыытык турар. Чааһынай киһи урбаанньыт буоллаҕына эрэ үүт туттарар кыахтанар. Чуолаан, дьоннор урбаанньыт буолар түгэннэригэр ханнык нолуогу ылынан төһө сууманы төлүөхтэрин сөбүгэр элбэх ыйытыы киирбит. Ону тэҥэ, социальнай контракка кэнники туох уларыйыылар киирбиттэрин, соцконтракт ылыы тустарынан кэпсэтии тахсыбыт.
“Хатырыкка холобура, байыаннай дьайыыга кыттыыны ылар байыастар чугас дьонноро кыттыһан иистэнэллэр. Кинилэр инникитин, соцконтракт көмөтүн ыланнар, салгыы тигиинэн дьарыктанар баҕа санаалаахтарын эттилэр. Бу барыта дьарыктаах буолууга тиэрдэр”, – диир Марфа Семеновна.
Оттон Модутка үүт туттарааччылар эрдэ кэтэх хаһаайыстыбалаахтары кытта кыттыһан туттарар эбит буоллахтарныа, билигин бэйэлэрэ туһунан үүт туттарарга хайдах урбаан эйгэтигэр киирэллэригэр сүбэлэппиттэр.
“Нэһилиэктэринэн дьону кытта көрсүүгэ социальнай харалта, социальнай фонд управлениелартан специалистар үлэлэһэллэр. Биэнсийэҕэ тахсар сааһа кэлбит эрээри, үлэлээбит ыстааһа тиийбэт дьоҥҥо хайдах гынан маны көннөрөргө тута быһаараллар, сүбэ-ама биэрэллэр”, – диир Марфа Тарабукина.