ООО «Сандалы» (директор Митюкова С.В.) производстватын иһигэр Сунтаарга, Элгээйигэ, Тойбохойго, Бордоҥҥо хлебопекарня уонна кондитерскай сыах, онтон эт оҥоһуктары оҥорор сыах Сунтаарга таһаарыылаахтык үлэлии тураллар. Барыта 60-ча киһи хабыллан турар, дириэктэринэн 2017 сылтан Светлана Викторовна Митюкова Новосибирскай куораттан кэлэн үрдүк тэрээһиннээх, ситиһиилээх үлэтин көрдөрө сылдьар.
Улахан коллективпытыгар икки технологтаахпыт, Николаева О.Е. килиэп уонна бурдук ас технолога, үрдүк үөрэхтээх специалист Степанова А.В. – эт бородууксуйатын технолога. Аныгылыы сайдыылаах олох ирдэбилигэр сөп түбэһэр специалистардаах, дириэктэрдээх буоламмыт дөкүмүөн өттө (техкарта, производственнай анализтар, графиктар, табеллэр, отчуоттар) сааһыланна, астыыр аспыт хаачыстыбата өссө тубуста. Хас биирдии сыах үлэһиттэрэ техкартаны тутуһан үлэлииллэр.
Пекарня коллективын 6 сыл устата Людмила Андреева иилээн-саҕалаан салайан үлэлэттэ. Олус эппиэтинэстээхтик, үлэтигэр бэриниилээхтик үлэлээн бу сыл ыам ыйын 1 күнүттэн общепит салайааччытынан үрдээн барда. Саҥа сэбиэдиссэйинэн Галина Пахомова ананна, өр сылларга производстваҕа буспут- хаппыт, элбэх сыратын биэрэр инникигэ кэскиллээх салайааччы. Галина Семеновнаҕа саҥа үлэтигэр үрдүктэн үрдүк ситиһиилэри баҕарабыт. Пекарняҕа өр сылларга үлэлээбит коллегаларбыт Елена Миронова, Анатолий Яковлев, Светлана Ефремова, Иван Осипов опыттарын эдэр көлүөнэҕэ, ыччаттарбытыгар үллэстэллэр, сөпкө такайан, үлэ халыыбыгар түргэнник киллэртииллэр. Пекарняҕа 12 араас килиэп астанан нэһилиэнньэҕэ хамаҕатык тарҕанар. Саамай дьон сөбүлээн сиир килиэбэ сывороточнай, ржаной, бородино, богатырскай уонна доруоһата суох заливной килиэп астанар. Итиилии, сибиэһэйдии торговай точкаларга илдьэн бириэмэтигэр тириэрдэр суоппардарбыт Максим Анисимов уонна Андрей Трофимов, оробуочайдарбыт – өр кэмҥэ үлэлээбит Александр Мирович уонна Анатолий Егоров. Бэкээринэ тутаах үлэһиттэрэ 8 пекардарбыт. Түүннэри-күнүстэри сменанан эдэр-эрчимнээх үлэһиттэрбитигэр Захар Кузнецовка, Алексей Поповка, Андрей Максимовка эрэлбит улахан.
Кондитерскай сыах үлэтэ I категориялаах кондитер, элбэх опыттаах Таисия Сосина салайыытынан барар. Сыах икки сменанан үлэлиир. Сарсыарда айылҕа уһуктарын кытта тэҥҥэ кэлэн 5 чаастан үлэлэрэ саҕаланар. Бастакы сменаны өр сылларга үлэлээбит 1 категориялаах кондитер Таисия Сосина, иккис сменаны 2 категориялаах опыттаах үлэһиппит Елена Иванова салайаллар. Кондитерскай сыахха эдэр, эрчимнээх үлэһиттэрдээхпит Сахая Тыасытова, Наталья Потапова, Елизавета Иванова. Ону таһынан, сыахха биир эр киһилээхпит, Михаил Игнатьев. Кини ис сүрэҕиттэн астаабыт тортарын арааһа минньигэс буолара олус үөрдэр.
Биһиги сыахпытыгар 150 араас аһылык астанар. Холобур, 20 араас торт, 20 араас бэчиэнньэ, 3 араас лэппиэскэ, 5 араас ыһаарыламмыт продукция уонна да атыттар. Бу үлүгэр элбэх араас аһылыгы астыырга сүрдээх дьаныардаах, талааннаах, ис сүрэхтэриттэн талан ылбыт идэлэригэр сөп түбэһэр үлэһиттэрдээх буоламмыт үлэни кыайабыт. Саҥа продукциялары технологы кытта биир санаанан айан оҥорон таһаараллар, онно араас ааттаах печеньелар бааллар, холобур, «Маффин», «Апельсиновый», «Банановый», «Брауни», «Вишенка», «Кайзер», «Кейк», печенье домашнее уонна да атыттар. Маны таһынан, тематическай ыйдарга кондитерскай набордары оҥорон таһаарабыт, холобур Пасхаҕа куличи, ойуулаах буспут сымыыттар, атын бырааһынньыктарга анал набордар буолаллар.
Дьэ ити курдук, күөстүү оргуйа сылдьар «Сандалы» коллектива өссө эт продукцияны оҥорор сыахтаах. Бу коллективы эдэр, эрчимнээх, үс оҕолоох ыал ийэтэ Дария Саввинова салайан илдьэ сылдьар. Сыах 5 үлэһитэ нэдиэлэҕэ биир күн өрөбүллээхтэр, эдэр коллектив олус бэриниилээх, бэйэ бэйэлэригэр эйэҕэс сыһыаннаахтар. Эдэр ыччаттарга сүбэ- ама биэрэр уоппуттаах үлэһиттэртэн Мария Саввинова, күөх Ньурбаттан төрүттээх Александр Иванов, 18 сааһыттан «Татыйыына» компанияҕа үлэлии сылдьар Александр Осипов. Манна 100-чэ араас продукция оҥоһуллан тахсар, холобур, 4 араас шашлык, 3 араас пельмень, 2 араас балык, эриллибит эттэн элбэх араас котлеттар, бифстроганов, копченостар уо.д.а. Кэнники бириэмэҕэ улахан ситиһиибитинэн буолар, оҥоһуллубут продукция барыта упаковкаланан, этикеткаланан тахсара. Манна эппиэттээх Гульнара Егорова, өр сылларга үлэлээбит уопуттаах эрэллээх үлэһит. Напарнига быйыл саҥа аармыйаттан кэлбит эдэр үлэһит Эдуард Сарафанов. Сыахпытыгар автоматизация киирбитэ үөрүүлээх. Пекарняҕа тестоделитель, тестомешалка, кондитерскай сыахха миксер үс арааһа, тестоотсадочнай массыына, тестомешалка, мясной сыахха фаршемешалка, тестомешалка, шоковай заморозка улахан көмө буолар. 2019 сыллааҕы бэриллибит былааны аһара толорон, үчүгэй көрдөрүүлээх үлэһиттэрбитигэр харчынан бириэмийэ бэриллибитэ махталлаах, ол улахан стимул буолар. Быйылгы былааны үрдүк ситиһиилээх ыларга үөрэ-көтө, кыһаллан-мүһэллэн үлэлии-хамсыы сылдьабыт.
Источник: Корпоративная газета группы компаний «Татыйыына»