Ил Дархан Айсен Николаев быһа эпииригэр урбаанньыттарга ыарахан кэмнэр кэлбиттэрин, нолуок ыараабытын, онон сорох биисинэс эйгэтэ күлүккэ баран эрэрин туһунан эттилэр. Бу туһунан туох санаалааҕын биһиги СӨ “Мин биисинэһим” киин Амма улууһугар салаатын салайааччыта Александра Николаеваттан туоһуластыбыт.

“Кырдьык, билигин кыра уонна орто урбаан (КЭОУ) эйгэтэ улахан уларыйыылары, ыарахаттары көрсөр. Нолуок реформата, Киин Баан үрдүк ставкалара уонна дьон атыылаһар күүһэ аҕыйааһына — бу барыта урбаанньыттартан эбии күүһү, дьулууру эрэйэр. Ил Дархан Айсен Николаев кыра биисинэһи нолуогунан баттаабакка, өйүөххэ наада,  маныаха муниципалитеттар биир улахан өйөбүлүнэн буолуохтаахтар диэн этиитин кытта толору сөбүлэһэбин. Биһиги, «Мин биисинэһим» киин үлэһиттэрэ, күн аайы урбаанньыттар кыһалҕаларын истэбит, быһаарабыт. Ол иһин, Ил Дархан Айсен Николаев  улуус баһылыктарыгар туһаайан  урбааны өйүүргэ  ыҥырыытыгар толору сөбүлэһэбин.  Билиҥҥи уустук кэмҥэ  урбаанньыттарга  комплекснай өйөбүл оҥоруу – биһиги кииммит сүрүн соруга диэххэ наада. Ол курдук кинилэргэ анаан  сүбэ-ама биэрэр,  араас үөрэх  бырагыраамаларын ыытабыт, граннары уонна субсидиялары ыларга көмөлөһөбүт. Бүгүҥҥү кэмҥэ бу оҥоһуллар өйөбүл өссө күүһүрүөхтээх.

Иккиһинэн, муниципалитеттары кытта ситим эмиэ  күүһүрүөхтээх. Ил Дархан  улуус баһылыктара тус эппиэтинэһи сүгүөхтээхтэр диэн этиитэ  олус улахан суолталаах.  Ол курдук олохтоох дьаһалталар урбаанньыкка саамай чугас турар институт буолаллар. «Мин биисинэһим» киин муниципалитеттары кытта күүстээх ситими олохтоон, урбаанньыттарбытыгар  араас кээмэйдээх өйөбүлү оҥорорго дьулуһабыт. Үсүһүнэн,  саҥа инструменнары киллэрии. Ол эбэтэр билиҥҥи кэм уларыйыыларыгар сөп түбэһиннэрэн,  “Кыһалҕаны быһаарыы”  ыстааптарын тэрийии. Бу ыстааптар  урбаанньыттар кинилэр тирээн турар кыһалҕаларыгар көмөлөһүөхтээхтэр,  дьаһалта иһинээҕи эбэтэр муниципалитет таһымыгар  баар буолуохтаахтар. Аны НДС-ка көһүүгэ аналлаах консультациялар оҥоһуллуохтарын наада. Олохтоох оҥорон таһаарыылары батарыыга урбаанньыттар  араас дьаарбаҥкаларга кытталларыгар,  экспортка тахсалларыгар көмөлөһүөхтээхпит. Биһиги күүспүт – бииргэ үлэлэһиҥҥэ сытар”, – диэн  СӨ “Мин биисинэһим” Амма улууһугар салаатын салайааччыта Александра Николаева санаатын үллэстэр.

“Амма олоҕо” хаһыат