Ордук тыа сиригэр, хоту бэйэ дьыалатын тэринэн, үлэлии-хамсыы сылдьар дьону хайгыы эрэ көрөҕүн. Бүгүн ааҕааччыларбар Раиса Корякина туһунан кэпсиэм.
Кини Кэбэргэнэ бөһүөлэгэр бэйэ дьыалатын арынан, килиэп астааччынан үлэлээбитэ номнуо үһүс сылыгар барда. Үрүҥ, хара минньигэс килиэби буһаран, бэкээринэ олохтоохтор биһирэбиллэрин ылар, ньиргиччи үлэлиир.
Раиса бүтүн нэһилиэк килиэбин буһарар дьарыгын, урбаанньыт үлэтин туһунан бу курдук сэһэргиир:
‒ Бэкээринэ хайысхатынан дьыала арынар хоту сиргэ олус уустук уонна эппиэтинэстээх. Бастатан туран, баҕа баар буолуохтаах. Баҕа баар буоллаҕына, киһи тугу барытын кыайар. Итини таһынан, үлэҕин таптыаххын, сөбүлүөххүн наада. Мин үлэҕэ сыстаҕас элбэх оҕолоох дьиэ кэргэҥҥэ төрөөбүтүм. Бурдук араас көрүҥүн оҕо сааспыттан сөбүлээн астыыбын. Онтон биэкэр буоларбар, элбэх килиэби астыырбар биир дойдулааҕым Мария Захарова көрдөрөн, сүбэлээн-амалаан биэрбитэ. Күҥҥэ 70-тан тахса килиэби астыыбын, биирдэ эмэ булка буһаран, олохтоохтору үөрдэбин. Маны таһынан бэкээринэҕэ, арктическай торгово-логистическай хампаанньа Абыйдааҕы филиалын кытта дуогабардаһан, ас арааһын атыылыыбын.
Үлэм норуокка туһалааҕын иһин олус сөбүлүүбүн. Килиэптэрбитин кыамат араҥаҕа, бириэмэтэ суох дьоҥҥо сайаапканан илдьэн биэрэбит. Былырыын уолум Дьулус үлэлээбитэ, онтон быйылгыттан 2-с кылаас үөрэнээччитэ Кирилл түҥэтэр.
Оһоҕум эргэрэн, эрэй бөҕөтүн көрсүбүтүм. Хайдан да өрөмүөннээтэххэ уһаабыта икки нэдиэлэ эрэ үлэлиирэ. Олохтоох дьаһалта өйөбүлүнэн икки өттүттэн дуогабардаһан, кыһыҥҥы суолунан саҥа килиэп буһарар оһох тиэллэн кэлэн, үлэм күөстүү оргуйда. Онон нэһилиэгим баһылыгар Иван Иванович Атласовка махталым уҕараабат.
Хаһаайка ас астыырга күннээҕи настарыанньаҥ наһаа улахан оруоллааҕын туһунан этэр. «Ол иһин килиэппин уонна бурдук аспын астыырбар үөрэ-көтө сылдьабын. Дьарыкпын сөбүлүүбүн», — диэн кэпсиир.
Раиса килиэп астыырын таһынан өссө дьахтар кэмитиэтин бэрэссэдээтэлэ, элбэх оҕолоох ийэ. Онон үлэтэ күн устата хара баһаам, баһа-атаҕа биллибэт. Инникитин 100 устуука куурусса ииттэн, нэһилиэнньэни сымыытынан хааччыйар баҕа санаалаах.
Раисаҕа кытаанах доруобуйаны, дьиэ кэргэҥҥэр дьоллоох олоҕу, барыстаах үлэни, сайдыыны, баҕа санааҥ үтүө түмүктэрдээх буолалларыгар баҕарабын. Сыалгын-соруккун ситэн, үлэҥ-хамнаһын таһаарыылаах буоллун!