Үс оҕолоох Екатерина, Алексей Андросовтар «Hilton_Myry» диэн кыһыннары, сайыннары үлэлиир бэртээхэй дьиэ арендатын тэрийэн, улууска биир саҥа өҥөнү киллэрдилэр. Эдэр ыал бэйэ дьыалатын бэйэлэрин күүстэринэн, улахан баҕа санааларынан арынан, тэрээһин үлэтигэр чугас дьоннорун, доҕотторун-атастарын өйөбүлүнэн, былааннарын ситистилэр, олоххо киллэрдилэр.
«Hilton_Myry» – бэртээхэй «А-фрейм» (домик-шалаш) быһыылаах аныгы, тупсаҕай дьиэҕэ ханнык баҕарар бырааһынньыктары бэлиэтииргэ, киһи сынньанарыгар бары усулуобуйа барыта тэриллибит. Ону таһынан тиэргэн иһигэр сынньанарга, хаартыскаҕа түһэргэ аналлаах үгүс кыраһыабай зоналаах. Оттон бу өҥөнү тэринэргэ хайдах ылсыбыттарын туһунан дьиэ кэргэн ийэтэ Екатерина Андросова кылгастык бу курдук билиһиннэрдэ.
— «Биһиги үс оҕолоох ыал буоларбыт быһыытынан биһиэхэ өрүү оҕо төрөөбүт күнүн ханна бэлиэтиибит диэн ыйытыы турааччы. Кырдьыгынан эттэххэ, Бороҕон иһигэр аныгылыы уонна усулуобуйата барыта баар кафе да, арендаҕа дьиэлэр даҕаны суохтарын тэҥэ. Ол иһин “арай маннык өҥөнү тэрийдэххэ хайдах буолуоҕай” диэн санаалар киирбиттэрэ. Биллэн турар, бастаан ылсарга уустук этэ. Онтон кырабыт арыыйда улааппытын кэнниттэн, чахчы ылсар эбиппит диэн, кэргэмминээн сүүрэн-көтөн, бэйэбит үп-ас булан, түргэн баҕайытык биригээдэ кэпсэтэн, кулун тутартан тутуубут номнуо саҕаламмыта уонна бэс ыйыттан арыллан үлэлээтибит. Тутуутун барытын биригээдэ ыыппыта, уоннааҕы үлэтигэр дьоммут, доҕотторбут көмөлөспүттэригэр махталбыт муҥура суох. Билиҥҥи кэмҥэ дьон барыта кэрэҕэ тардыһар, бэйэтин чугас дьонун, доҕотторун кытары үчүгэй сиргэ, усулуобуйалаах дьиэҕэ-уокка сылдьан, саҥа санааны, эмоцияны ылыан баҕарар. Ол олохпут ирдэбилэ. Онон маннык саҕалааһыннар улууспутугар эмиэ баар буолуохтарын уонна тигинэччи үлэлиэхтэрин баҕарабыт».
Саҥа-сонун көрүүлээх, олохторун бэйэлэрин күүстэринэн киэргэтэргэ дьулуһар эдэр Андросовтар дьиэ кэргэҥҥэ саҕалааһыҥҥыт ситиһиилээх буоларыгар баҕарабыт!
