Бу күннэргэ СӨ урбаанньыттарын быраабын көмүскүүр боломуочунайа Альбина Кычкина уонна Дьокуускайдааҕы дьоҕус урбаан сойууһун салайааччыта Лена Данилова Бэрдьигэстээххэ үлэлээтилэр.

Кинилэр сарсыарда улууска үгэс буолбут «Бизнес-завтрак» диэн көрсүһүүгэ сылдьан, нэһилиэк урбаанньыттарын кытта көрсөн, этиилэрин истэн, үлэлэригэр ханнык кыһалҕалары, харгыстары көрсөллөрүн туһунан сиһилии кэпсэттилэр.

Улуус баһылыгын кытта көрсүһүүгэ Альбина Егоровна урбаанньыттар туруорсууларын билиһиннэрдэ. Ол курдук, эргиэн маҕаһыыннаах урбаанньыттарга өйөбүл, субсидия наадатын, нолуокка кыра да иэстээх буолуу судаарыстыбаттан көмөлтө ыларга харгыстыырын, туризмынан дьарыктанааччылар базаларыгар уот линиятыгар холбонор ирдэбиллэрэ үрдүгүн, федеральнай тэрилтэттэн олус уһуннук эппиэти күүтэллэрин, пилораманы бөһүөлэк таһыгар көһөрөр суоллары, НПД нолуога улуус бюджетыгар киирэрэ ордугун, Уһук Илин гектарын чэрчитинэн сир ылбыт дьонтон тугу да туттубатахтарына судаарыстыба төттөрү былдьыан сөбүн-суоҕун, о.д.а. сытыырхайан турар боппуруостары ырыттылар.

Күн иккис аҥарыгар гаас ситимин кыайан объектарыгар киллэттэрбэккэ олорор маҕаһыыннаах урбаанньыттар кэлэн көрсүстүлэр. Бу боппуруоһу Альбина Кычкина тус хонтуруолбар ыллым диэн мэктиэлээтэ. Улуус прокурора Михаил Кардашевскай объектаах урбаанньыттары уонна «Сахатранснефтегаз» тэрилтэтин үлэһиттэрин кытта тустаах көрсүһүүнү тэрийиэххэ диэн этии киллэрдэ. Лена Данилова куорат урбаанньыттарын кыһалҕата эһиэхэ холоотоххо олус кыра курдук, аныгы үйэҕэ оһох оттон олорор урбаанньыттар баалларын итэҕэйбэт этим диэн сонньуйан ылла.

Салайааччылар нэһилиэккэ үлэлиир энтузиаст дьоҥҥо, мини-зоопарканы үлэлэтэр эдэркээн Яна Даниловаҕа, удьурҕайынан дьарыктанар Валерий Дьячковскайга ыалдьыттаан, үлэ үөһүгэр сылдьалларын көрөн сөхтүлэр-махтайдылар.

Альбина Кычкина улууска араас таһымнаах көмөлтө, урбаанньыттары өйүүр программалар баалларын хайҕаан бэлиэтээтэ, улуус баһылыгар Никита Андреевка махтанна. Бу курдук урбаанньыттарга да, боломуочунайга да олус көдьүүстээх, үтүө түмүктээх күн ааста.

Үлэ сылыгар «Мин биисинэһим» киин өрөспүүбүлүкэ экономикатын сайдыытыгар бэйэ кылааттаах урбаанньыттар үлэлэрин-хамнастарын туһунан сырдатар. Биһиги урбаанньыттарбыт туруу үлэһиттэр буолалларын уопсастыба сыаналыыр уонна биһириир.

«Дьоҕус уонна орто урбаан» национальнай бырайыак чэрчитинэн «Мин биисинэһим» киин нөҥүө урбаанньыттарга киэҥ хабааннаах араас өҥө көрүллэр. Бу туһунан ыйыллыбыт сигэнэн киирэн ааҕыахха сөп – Мойбизнес14.рф     

Күннэй Алексеева

ГАУ РС(Я) «Центр «мой бизнес»