Бэрдьигээстээххэ Сэмэн, Соппуруон Даниловтар ааттарынан Духуобунас киинигэр  тэрилтэлэр икки ардыларыгар «ТОК» – толкуйдаа, оонньоо, кыай» диэн күрэхтэһии ыытылынна.

Духуобунас киинин үлэһиттэрэ бу оонньууну хаһыс да төгүлүн тэрийэн ыыталлар. Ыйытыктара бу сырыыга быйылгы Өрөспүүбүлүкэ күнүнэн Сахабыт сирин историятыгар, чулуу, үлэһит дьонугар туһуланна. Бастакы хамаандаҕа урбаанньыттар, иккискэ улуус дьаһалтатын финансовай-казначейскай управлениетын уонна үһүскэ судебнай приставтары кытта налоговай инспекция холбоһуктаах хамаандалара күөн көрүстүлэр.

Уопсайа, сэттэ түһүмэхтээх күрэхтэһии кэнниттэн Сахабыт  сирин историятын үчүгэйдик билэллэринэн, саамай болҕомтолоохторунан урбаанньыттар хамаандалара буолан, кыайыылаах таҕыстылар. Бары кыттааччыларга тэрийээччилэр туоһу суруктары туттардылар, кыайыылаах хамаандаҕа үбүнэн 1500 солк бириэмийэ анаатылар.

Онон урбаанньыттар диэн тутатына толкуйдуур, булугас өйдөөх, түргэн туттунуулаах дьон буоларын бу күн кинилэр толору дакаастаатылар уонна туттарбыт бириэмийэлэрин биир дойдулаахпытыгар Москубаҕа баран эмтэнэр эдэркээн уолга С.С.Акимовка биэрдилэр.

Күннэй Алексеева