Нэһилиэнньэ Саҥа дьыллааҕы сынньалаҥын үрдүк таһымҥа тэрийэн баран, үлэ арыый үмүрүйүүтэ, улууспут урбаанньыттара үөрүүлээх бырааһынньыктара тэрилиннэ.

Бу күн урбаанньыттар ааспыт сылы түмүктээтилэр, инники былааннары торумнастылар.

Горнай улууһун баһылыга Никита Андреев, Бэрдьигэстээх нэһилиэгин баһылыга Алексей Аргунов араас тэрээһиннэргэ мэлдьи күүс-көмө буолар урбаанньыттарга Махтал суруктары туттардылар.

Үлэ миэстэтин таһаарар, сүүһүнэн киһини үлэлэтэр, нэһилиэнньэни сибиэһэй, удамыр сыаналаах бородууктанан хааччайар, бары кыһамньыларын уурар, араас өҥөнү быыстала суох оҥорор, күндү дьоммутугар, урбаанньыттарга, өссө төгүл махтаныахха.

Республикатааҕы урбааны өйүүр «Мин биисинэһим» киин Горнайдааҕы салаатын салайааччыта Марианна Попова санаатын үллэстэр:

«Сылы түмүктүүр тэрээһиммитигэр кэлэн кыттыбыт урбаанньыттарга, тэрийээччилэр ааттарыттан махталбытын тириэрдэбит. Тэрээһиммит биир сүрүн уратытынан «Бэргэн» стрелковай тииргэ урбаанньыттар икки ардыларыгар тэриллибит күрэхтэһии буолла.

Бу күннэргэ туран биэрбит тохсунньу томороон тымныытын аахсыбакка, бииргэ үлэлиир дьон атын нэһилиэктэртэн кэлэн кыттыбыттара тэрээһини сэргэхситтэ. Ол курдук Өрт, Орто Сурт, Аһыма бэрэстэбиитэллэрэ, ону таһынан Маҕарастан бүтүн хамаанда кэллэ. «14 регион» кафе кэлэктиибэ олус үчүгэй бириистэри оонньотто. Зинаида уонна Гаврил Чемезовтар, тоҕуһуонус сыллартан урбаанынан дьарыктанар дьиэ кэргэн, бу күн соһуччу олус үчүгэй көстүүлээх 127 ытар салюту бэлэхтээбитэ тэрээһиммит биир сүрүн үөрүүтэ, умнуллубат түгэнэ буолла.

Куруутун маннык олох бары түгэнигэр көхтөөх, түмсүүлээх буолуоххайын. Саҥа сылга саҥа саҕахтары, кыайыылары, ситиһиилэри баҕарабын! Барыбытыгар ил-эйэ, кытаанах доруобуйа, дьоллоох олох баар буоллун!»

Куннэй Алексеева

ГАУ РС (Я) «Центр «Мой бизнес»