Бу күннэргэ Горнай улууһун Бэрдьигэстээҕэр, Соппуруон уонна Сэмэн Даниловтар ааттарынан Духуобунас киинигэр ураты тыыннаах, айылҕа материалыттан, удьурҕайтан оҥоһуллубут «Айылҕа дьикти көстүүлэрэ» диэн анал быыстапка арыллыыта буолан ааста.
Быыстапка ааптара Саха сирин транспорын үтүөлээх үлэһитэ, Саха Өрөспүүбүлүкэтин транспорын бочуоттаах үлэһитэ, Горнай улууһун норуодунай маастара, «Горнай улууһугар сайдыытын кылаатын иһин» бэлиэ хаһаайына Валерий Моисеевич Дьячковскай «Сиэн Харах». Кэлбит ыҥырыылаах ыалдьыттар, биир үөлээннэхтэрэ, «Тиһилик» норуот маастардарын коллектива, бииргэ үөрэммиттэр, доҕотторо, аймахтара сылаас истиҥ тылынан аҕыннылар, махтал, эҕэрдэ тылларын анаатылар.
«Мин маһынан кыралаан эдэр эрдэхпиттэн уһанарбын сөбүлүүбүн. Ол эрэн анаан-минээн пенсияҕа тахсан баран, сололонон, иэйии киирэн дьэ утумнаахтык дьарыктаммытым сэттис сыла барда. Билиҥҥи туругунан араас темаларга 170-тан тахса мас оҥоһуктара силиктэрэ ситэн бэлэм буоллулар. Бу сыллар тухары араас быыстапкаларга, курэхтэргэ кыттабын. Ситиһиилэр син бааллар, ол курдук сүрүннэриттэн үллэстэр буоллахха Үөһээ Бүлүүгэ 2017 сыллаахха, Горнайга 2021 сыллаахха ыытыллыбыт «Манчаары оонньуулара» чэрчитинэн буолан ааспыт аһаҕас республикатаа5ы уус-уран оҥоһуктар маастардарын күөн-күрэҕэр Кылаан бириис уонна Чыпчаал Аат хаһаайыннара буолбутум. Ону таһынан 2019 сыллаахха Санкт-Петербург куоракка тиийэн «Снежные узоры Якутии» диэн уус-уран оҥоһуктар быыстапкаларыгар кыттан турабын. Онно мин оҥоһуктарым улахан сэҥээриини ылбыттара.
Быйыл Горнайдааҕы «Мин биисинэһим» киин көмөтүнэн самозанятай буоллум, онон үлэм-хамнаһым кэҥииригэр эрэнэбин. Марианна Семеновна сүбэтинэн, кэмигэр сайаапка суруйан биэрэммин, оҥоһуктарбын босхо анал хаартыскаҕа түһэттэрдим. Кэлин каталог оҥосторбор көмө буолуоҕа. Инникитин да бу киини кытта ыкса үлэлэһэр былааннаахпын», — диэн Валерий Дьячковскай кэпсээтэ.
Быыстапкаҕа турбут оҥоһуктар чахчы даҕаны хас биирдии дьон болҕомтотун тардар ураты күүстээх. Улууспут, Өрөспүүбүлүкэбит олохтоохторун быыстапканы кэлэн көрөргүтүгэр ыҥырабыт.
Быыстапка алтынньы 13-28 күнүгэр дылы буолар.
ГАУ РС(Я) «Центр «Мой бизнес»
