Бүгүн “Фаворит” бильярд кулуубугар илин эҥэрдэр аһаҕас турнирдара саҕаланна. Таата, Чурапчы, Уус Алдан, Мэҥэ Хаҥалас уонна Амма бастыҥ оонньооччулара икки күннээх түүн хоно сытан күүстэрин холоһуохтара. Үбүлүөйдээх оонньууга өрөйөн-чөрөйөн өрөгөйдөөбүттэри өйүүн көрөн-истэн билиэхпит. Онтон бүгүн — турниры аһар үөрүүлээх күн.
Бильярд спорда Аммаҕа сайдарыгар суолталаах хардыыны урбаанньыт Григорий Аммосов оҥорбутун мэлдьэһэр киһи суох. Биэс сыл анараа өттүгэр бильярд кулуубун төрүттээн, дьиэ-уот тутуоҕуттан ыла улууска бильярдынан дьарыктанар дьон халҕаһата балай эмэ халыҥаата. Урут, дьон кулуупка, саалаҕа биир-икки остуолга сүһүөх ууллар уһун уочаратын ааһан оонньуур бэйэлэрэ, билигин “Фаворит” түөрт остуолугар төкүнүйэ сылдьан оонньоон тириилэрэ тэнийэр. Аммосов кулууба сыччах дьону көччүтэн оонньоторунан муҥурдаммакка, араас таһымнаах күрэхтэһиилэри тэрийэн, баардаах оонньооччулар салгыы сайдалларыгар кынат анньар.
Григорий Григорьевич төрүттээбит кулууба “Фаворит” үбүлүөйдээх биэс сылынан оройуон дьокутаттарын Сэбиэтин бэрэссэдээтэлэ Владимир Колосов, улуус баһылыгын социальнай боппуруоска солбуйааччы Нюргуяна Илларионова, спорт управлениетын салайааччы Дмитрий Наумов о.д.а. эҕэрдэ тылларын эттилэр, наҕараада туттардылар.
Сэбиэт бэрэссэдээтэлэ Владимир Колосов кулууп хаһаайынын уруккуттан убаастыырын биллэрдэ: “Григорий Григорьевич Амма улууһун киэн туттар сатабыллааҕа, урбаанньыта. Дьиэ кэргэнинээн кимтэн да харчы, көмө көрдөөбөккө бэйэлэрин күүстэринэн кулуубу тутан үлэҕэ киллэрбиттэрэ хайҕаллаах. “Фаворит” кулуубугар тэҥнэһэр чааһынай кулууп өрөспүүбүлүкэҕэ суох, баар да буоллаҕына, бука, ахсааннаах буолуо”, — диэн туран улууска бильярд сайдарыгар маҥнайгынан хамсаммыт киһиэхэ улуус бастакы кулубата Афанасий Рязанскай бүүһүн туттарда.
Улуус баһылыгын солбуйааччы Нюргуяна Илларионова Григорий Григорьевиһы биир киһи холугар сүҥкэн үлэни оҥорбутун улаханнык сыаналыырын эттэ: “Киһи баҕаран туран ылыстаҕына, сорунан туруннаҕына барытын кыайыан сөбүн Григорий Григорьевич көрдөрдө, туоһулаата. Бильярд спордун улууска күүскэ сайыннаран, билигин илин эҥэри ааһан өрөспүүбүлүкэҕэ тиийэ ситиһиилээхтик оонньуур спортсменнардаахпыт. Онон Григорий Григорьевич холобур буолар киһи. Маннык дьонноохпутунан биһиги киэн туттабыт”. Нюргуяна Ивановна улууска спорт сайдарыгар тус кылаатын иһин улуус баһылыгын махтал суругун Григорий Аммосовка туттарда. Маннык ис хоһоонноох махтал суруктары Савва Антипин, Евсей Никифоров, Егор Николаев, Василий Ефремов, Егор Чемезов, Ньургун Артемьев, Егор Иванов, Петр Устинов, Афанасий Максимов, Василий Кузьмин туттулар.
Спорт управлениетын салайааччы Дмитрий Наумов “Фаворит” кулууп төрүттэммит үбүлүөйдээх сылынан эҕэрдэлээн туран саха сирин спордун миниистирэ Леонид Спиридонов эҕэрдэ суругун Григорий Аммосовка, Михаил Неустроевка уонна Алексей Пахомовка туттарда. Итини таһынан бу спорду күүскэ пропагандалыыр, бильярд диэн баран муннукка ытаабыт дьоҥҥо Николай Константиновка, Мичил Новиковка, Петр Гермогеновка, Валентин Ивановка, Михаил Чириковка, Семен Григорьевка, Владимир Даниловка улуустааҕы спорт управлениетын махтал суруктарын туттарда.
“Фаворит” салайааччыта Григорий Аммосов үбүлүөйдээх оонньууга ыҥырыыны ылынан кэлбит ылса-бэрсэ олорор ыкса ыаллыы улуустарга улаханнык махтанарын биллэрдэ. Салгыы даҕаны бииргэ тутуһа сылдьыаххайыҥ диэн ыҥырда. Григорий Григорьевич “Фаворит” кулууп үбүлүөйүгэр анаан “Развитие бильярдного спорта в Амгинском улусе” диэн саҥа кинигэ суруйан таһаарбыттарын билиһиннэрдэ. Субу аҕай бэчээттэнэн кырааска сытынан дыргыйа сылдьар 165 илиистээх тос курдук халыҥ кинигэ үбүлүөйдээх оонньооччуларга бэртээхэй бэлэх буолла. Кинигэ бильярд летопиһыгар тэҥнэһэр дьоһун үлэ суруллубут –Арассыыйаттан саҕалаан Саха сиригэр, Аммаҕа бильярд хайдах сайдыбыт сырдатар. Григорий Григорьевич этэринэн, “Фаворит” кулуупка Амма бильярдистарын тус баҕаларынан мантан инньэ “кырдьаҕас оонньооччулар” үбүлүөйдээх саастарыгар туһунан күрэхтэһиилэр ыытыллар буолуохтара.
Этиллиэхтээх эҕэрдэ тыла баранан, бэриллиэхтээх бэлэх-туһах тиийэн спортсменнар эбиэттээт тута күрэхтэһэн саҕалаатылар. Икки күнүнэн кыайыылаахтары ааттаталыахпыт.