Бэйэ дохуотун оҥостор дьоҥҥо анаан Франция кухнятын билиһиннэрэр маастар-кылаас «Мин бизнеһим» киин нөҥүө барда.
«Novikov school», «Vip masters», «Andychef» асчыттар оскуолаларыгар үөрэммит Александра Ноговицына 4 французскай бүлүүдэни астаан көрдөрдө. Ол курдук, «Куриные крылышки в вине», «Оливье из креветок», «Тартар из жеребятины», «Бёф бургиньон» ингредиеннарын буллахха, түргэнник астанар бүлүүдэлэр эбит диэн хаһаайкалар сэҥээрдилэр.
«Александра наһаа түргэнник, сатабыллаахтык астаан көрдөрөн, барытын сиһилии кэпсээбититтэн бары да астынныбыт, үөрэннибит. Остуол тула олорон астаабыт аспытын боруобалаатыбыт, үүтээх чэй иһэ олорон санаа атастастыбыт, инникитин маннык тэрээһиннэргэ сылдьыахпыт, наһаа наадалаах. Самозанятайдарга анаан ыытыллыбыт тэрээһини өйөөбүт «Мин бизнеһим» киин салайааччытыгар Екатерина Николаеваҕа, үөрэхтээһини ыыппыт Александра Ноговицынаҕа кыттааччылар ааттарыттан махталбытын тиэрдэбит», — диэн Кэнтик нэһилиэгин олохтооҕо, оҕо көрөн олорор кэмигэр бэйэ дохуотун киллэринэр Федора Терентьева санаатын үллэһиннэ.
Александра Александровна минньигэстик астыыр кистэлэҥнэрин, сүбэлэрин, киэҥ билиитин, ас астыыр ымпыгын-чымпыгын көрдөрдө. Маастар-кылааска кэлбит бэйэ дьарыгынан эбии дохуот оҥостор ыал ийэлэрэ, эбээлэрэ сынньалаҥҥа тэҥнээх тэрээһинтэн астыннылар, үөрэ-көтө ураты амтаннаах астаабыт астарын боруобалаатылар.
Билиҥҥи үйэҕэ кыыс оҕо сатабыллаах хаһаайка, минньигэс астаах ыал ийэтэ буола үүнэн тахсарыгар бу курдук ураты хабааннаах, олоххо олус туһалаах тэрээһиннэр көмө буолаллара мэлдьэҕэ суох.
«Үөһээ Бүлүү» улуус хаһыата
