2015 сыллаахха Атыыр Айаан диэн сиргэ Эдьигээн оройуонун дьаһалтатын өйөбүлүнэн туристическай база тутуллубута. Ол эрэн манна туризмы сайыннарыыга ким да хоннохтоохтук ылсан үлэлэспэтэҕэ. Дьэ, быйыл сайын от ыйын ортотуттан Николай Иванов салайааччылаах «Баахынай» община бу дьыаланы сөргүтэн, туристическай база үлэтин саҕалаата. Аҕыйах кэм иһигэр оройуон үгүс олохтоохторо, ыалдьыттара номнуо базаҕа тиийэн сынньаннылар, биһирээтилэр.
«Быйыл дьэ, кэтэһиилээх, өр кэмҥэ ыра санаа оҥостубут баҕабытын толорон турбазабыт үлэтин саҕалаатыбыт. Ыалдьыттарга анаан табыгастаах усулуобуйаны барытын тэрийэ сатаатыбыт. Базаҕа тахсан сынньаныан баҕалаах дьону бэйэбит көлөбүтүнэн уу суолунан тиэрдэбит, 1 чааһы кыайбат кэм иһигэр сирбитин булабыт. Ол курдук, кэлбит дьон икки этээстээх дьиэҕэ тохтууллар, манна 5 киһиэхэ сөптөөх наадалаах тэрил барыта баар, уот биэрэр генератордаахпыт. Тэлгэһэҕэ турар беседкаҕа мангалга шашлык, тимир оһоххо ас астаныахтарын, ону сэргэ баанньыкка суунуохтарын, паарданыахтарын сөп. Утуйар таҥас, иһит-хомуос барыта көрүллэр. Сууккаҕа биир киһиттэн 1 тыһ. солк. ылабыт. Базаҕа ыалдьыттары көрсөр, сынньалаҥы тэрийэр үлэһиттээхпит. Эһиил сайын 5-6 табаны ыстаадабытыттан аҕалан бу турбазаҕа олохтуур былааннаахпыт, ол туһугар дьиэ кыылын тутарга сөптөөх усулуобуйаны тэрийиэхтээхпит. Инникитин өссө балыктааһыҥҥа көҥүл ылар баҕа санаалаахпыт, оччотугар сынньана кэлэр дьон балыктыыр, табалары илэ харахтарынан көрөр кыахтаныа этилэр, элбэх дьону угуйуо этибит», – диэн сонунун үллэһиннэ «Баахынай» община салайааччыта Николай Афанасьевич.
«Instagram» уонна «WhatsApp» социальнай ситимнэр нөҥүө хаартыскалары көрдөххө, үксэ Эдьигээн нэһилиэгин олохтоохторо бу турбазаҕа номнуо сынньаммыттар эбит. Ол дьонтон бу базаҕа сынньаммыт түгэннэрин туоһуластахха, бары хайҕыы эрэ кэпсииллэр, айылҕалыын алтыһа умнуллубат түгэни атаарбыттарын бэлиэтииллэр. Турбаза сайын саҕаланыытыттан балаҕан ыйын бүтүүтүгэр диэри сынньанааччылары корустэ.
Авторы Мария Аполонова, газета «Новости Жиганска» и Виктория Никитина, заведующая обособленным подразделением ГАУ РС(Я) Центр «Мой бизнес» в Жиганском улусе