Тыа хаһаайыстыбата өбүгэ саҕаттан саха дьонун төрүт дьарыга буолар. Этэҥҥэ кыстыгы туоруорбут, күөх окко үктэнэрбит икки ый хаалла. Билигин ынах маассабайдык төрүүр – быйаҥ кэмэ.
Нам улууһун Аппаанытын кэскиллээх ыччата, тыа хаһаайыстыбатын сайыннарар Василий Петров хаһаайыстыбатыгар сырыттыбыт, үлэтин билистибит. Вася ийэлээх, аҕатын хаһаайыстыбатын салгыы сайыннарар. Ийэтэ 2016 сыллаахха граҥҥа кыттан тэрээһиннээх хаһаайыстыба буолбуттар. Онтон 2020 сыллаахха Василий предприниматель быһыытынан регистрацияланан хаһаайыстыбаны кини көрөр-истэр. Ийэлээх аҕата күүс-көмө буолаллар уонна биир үлэһиттээх. Үүт туттаран аахсар үбүнэн хамнастыыр.
2023 сыллаахха Саха өрөспүүбүлүкэтин тыатын хаһаайыстыбатын министерствота ыытар «Агростартап» граныгар кыттан 5 мөл. субсидия ылбыт. Бу үбүгэр бэйэтин 500 тыһ. солк. эбинэн хаһаайыстыбатын сайдыытыгар туһанарга анаан «Беларус» МТЗ трактор, куун, ротор (от охсор), бырысыап уонна УАЗ бортобуой массыына атыыласпыт.
Бэйэлэрэ арыыга оттуур сирдээхтэр. «Кураан дьыл кэмигэр ыарахаттары көрсөөчүбүт. Саас халаан уута элбэх кэллэҕинэ үүнүү үчүгэй буолар. Ааспыт сайын 134 туонна оту отообуппут. Кыстыгы 110-120 туоннанан туоруубут. Онон сороҕун эбии дохуоттанаары атыылаатыбыт», — диир. От үлэтигэр техниканы туһанар буоланнар убайа көмөлөһөн иккиэн оттууллар. Сайынын, ыам ыйын бүтүүтэ түүлэспит сайылыктарыгар көһөн тахсаллар. Онно дьиэлээх-уоттаах, титииктээх, ынах ыыр аппарааттаах.
Василий тыа хаһаайыстыбатын түбүктээх үлэтиттэн быыс-арыт булан футболунан дьарыктанар. Сынньана таарыйа киэһэ аайы спорт саалга сылдьар үгэстээх. Кэргэнэ И.С. Гаврильев аатынан Нам 1-кы №-дээх оскуолатыгар учууталынан үлэлиир, икки оҕолоохтор, уһуйаан иитиллээччилэрэ. Күн түбүгэ суох эдэр дьиэ кэргэҥҥэ байылыат олоҕу баҕарабыт, хаһаайыстыбалара өссө кэҥээн, сайдан истин.
Семен Аргунов