Амма нэһилиэгэр уус кыһата баар буолла. Бүгүн Георгий Олесов-Дьулус Уус уһанар кыһатын дьиэтин үөрүүлээхтик арыйар сиэрэ-туома буолла.
Баардаах киһи мааны малааһыныгар Мандар Уус уһуйбут аатырбыт ууһа Сарыал Билюкин аат ааттаан кэлэн эҕэрдэтин эттэ, алгыһын анаата. Маны сэргэ улуус туох баар ааттаах-суоллаах уустара, улуус баһылыгын социальнай боппуруостарга солбуйааччы Нюргуяна Илларионова, культура управлениетын салайааччы Иван Иванов, улуус тимир уустарын түмсүүтүн салайааччы Роман Алексеев кыттыны ыллылар.
Георгий Афанасьевич – төрүт уус удьуорун ытык ыччата кыстыгын чаҥырҕаччы тыаһаппыта соччо ыраата илик да, бүгүн бэлиэр киһи киэн туттар ситиһиилэрдээх. Кини охсубут быһахтара өрөспүүбүлүкэҕэ элбэх күөн күрэстэргэ биһирэнэн хайҕаммыттара. Аны соторутааҕыта Амма бастыҥ уустарын быһахтарын тургутан көрөр күрэхтэһиигэ Георгий Олесев быһаҕа бастыҥ буолан турар.
Кыһа хаһаайына уһанар дьиэтин сайыны быһа оҥорон, хата, алгыс түһэр ахсынньы ыйын баттаһа бүтэрдэ. Бу иннинэ кыараҕас дьиэҕэ уһанан тыына-быара хаайтарбыт киһи киэҥ-куоҥ сиргэ тириитэ тэнийэринэн уһанаары ох курдук оҥостон, хараҕа уоттанан сылдьар.