Александр Дмитриевич «Саха өрөспүүбүлүкэтигэр бэйэ оҥорон таһаарыытын сайыннарар территориялар” сокуону олоххо киллэрии туһунан кэпсээтэ. Манна нэһилиэктэр баһылыктара, экономистар, бааһынай хаһаайыстыбалаахтар, урбаанньыттар уонна бэйэ дьарыктаах дьон кытыннылар.
“Бу сокуон экономическай сайдыы түргэтииригэр уонна бэйэ табаарын, өҥөтүн элбэтэргэ туһуланар. Холобур, атын улуустар эти оҥорон таһаарар комбинат, комбикорма сыаҕа, туризм, тыа хаһаайыстыбатын уо.д.а. курдук хайысхаларынан резидент буолан үлэлии сылдьаллар.
Биһиги СӨ Бырабыыталыстыбатыгар бу сокуоҥҥа үлэлэһэр туһунан бэйэбит этиибитин эмиэ киллэрэн турабыт. Онон бүгүҥҥү мунньах бэрт көдьүүстээх буолла, кыттааччылар интэриэһиргиир ыйытыыларыгар чопчу хоруйдары ыллылар”, — диэн улуус баһылыга Степан Саргыдаев бэлиэтээтэ.
Бу сокуоҥҥа бэйэ оҥорон таһаарыытын сайыннарабын диэн сыаллаах бэйэ дьарыктаах киһи (самозанятай), урбаанньыт, юридическай сирэй киириэн сөп, оонньуу бизнеһиттэн, подакцизнай табаартан, сиртэн хостонор баайы булан-талан атыылааһынтан ураты.