Бу күннэргэ Чурапчы улууһун дьаһалтатын аактабай саалатыгар «Уйгу туоната» олохтоох оҥорон таһаарыыны сайыннарар сири тэрийии боппуруостарыгар өрөспүүбүлүкэ экэниэмикэҕэ миниистирин солбуйааччыта Александр Афанасьев, СӨ инвестицияны тардыыга уонна экспоры өйөөһүҥҥэ агентствотын бырайыактары олоххо киллэриигэ отделын сүрүн менеджерэ Илья Прокопьев, кыттыылаах «төгүрүк остуол» буолла.

Төгүрүк остуолу улуус дьаһалтатын баһылыга Саргыдаев Степан Анатольевич саҕалаан уонна баһылыгы бастакы солбуйааччы Сивцев Егор Афанасьевич салайан ыыттылар.
Манна Саха сиригэр олохтоох оҥорон таһаарыыны сайыннарыыга үлэлиир территориялары тэрийии, бу сирдэр резиденнэригэр туох ирдэбиллэр баар буолуохтарын, кинилэр биисинэс-бырайыактарын оҥоруу тутаах механизмнарын тустарынан экэниэмикэ миниистирин солбуйааччыта Александр Афанасьев дакылаата, СӨ инвестицияны тардыыга уонна экспоры өйөөһүҥҥэ агентствотын бырайыактары олоххо киллэриигэ отделын сүрүн менеджерэ Илья Прокопьев хос дакылаата истилиннилэр, Чурапчы улууһугар маннык территорияны тэрийии тула ырытыһыылаах сиһилии кэпсэтии, санаа атастаһыыта таҕыста. «Төгүрүк остуол» үлэтигэр улуус уонна Чурапчы нэһилиэгин дьаһалтатын туһааннаах боппуруостарга бэрэстэбиитэллэрэ, Чурапчы улууһун «Мин бизнеһым” киин үлэһитэ, Чурапчы, Мындаҕаайы, Мугудай, Мырыла нэһилиэктэриттэн олохтоох оҥорон таһаарар тэрилтэлэр, урбаан эйгэтин салайааччылара кыттаннар, тус көрүүлэрин, этиилэрин иһитиннэрэн кытыннылар.