Тохсунньу ый 20 күнүгэр Чурапчы улууһугар бэрт сэргэх тэрээһин буолан ааста. Ол курдук,  Саха Өрөспүүбүлүкэтин тыа хаһаайыстыбатыгар уонна аска-үөлгэ политикатын министиэристибэтэ улахан делегациянан кэлэн үлэлээн барда. Бырабыыталыстыба Бэрэссэдээтэлин бастакы солбуйааччы, тыа хаһаайыстыбатын миниистирэ Петр Николаевич Алексеев  билиһиннэрбитинэн, министиэристибэ маннык элбэх киһилээх делегациянан Чурапчыга эрэ кэлэн үлэлээбит. Тааттаҕа буолбут маннык тэрээһиҥҥэ  25 специалист кыттыыны ылбыт эбит буоллаҕына, Чурапчыга министиэристибэ 45 үлэһитэ кэлэн тыа хаһаайыстыбатын инники сайдыытыгар быһаччы үлэлии-хамсыы сылдьар дьону кыта көрсөн сүбэлэһэн, элбэҕи ырытан, саҥалыы хайысхаларга элбэҕи сүбэлээн барда.

Делегация сарсыардаттан үс бөлөҕүнэн арахсан, нэһилиэктэргэ тахсан төгүрүк остуоллары тэрийэн, кэпсэтиилэри, инники турар соруктар тула дьүүллэһиини ыытта. Бастакы бөлөҕү миниистири бастакы солбуйааччы Татьяна Матвеевна Осипова салайан илдьэ сырытта. Маныаха  Хатылы, Болтоҥо, Арыылаах, Кытаанах нэһилиэктэрин бэрэстэбиитэллэрин Сылаҥҥа мунньан, «Драйвер развития сельских территорий» диэн тиэмэҕэ кэпсэттилэр. Итинник мунньаҕы миниистири солбуйааччы Афанасий Михайлович Семенов Хадаарга тэрийэн ыытта. Манна Болугур, Одьулуун, Хоптоҕо, Хайахсыт, Чакыр нэһилиэктэрэ кэлэн кыттыыны ыллылар. Үһүс бөлөҕү миниистири солбуйааччы Николай Ильич Петров Мугудай нэһилиэгэр таһааран киэҥ кэпсэтиини тэрийдэ. Манна Төлөй, Бахсы, Алаҕар, Соловьев нэһилиэктэрин бэрэстэбиитэллэрэ кыттыыны ыллылар.

Бырабыыталыстыба Бэрэссэдээтэлин бастакы солбуйааччы, тыа хаһаайыстыбатын миниистирэ Петр Николаевич Алексеев улуус баһылыгын Андрей Тимофеевич Ноговицыны кытта туспа графигынан сылдьан, Чакыр, Хайахсыт нэһилиэктэригэр суол тутуутун хаачыстыбатын көрдө, гаастааһын хаамыытын ситиһиилэрин  билистэ, Хоптоҕоҕо Эрилик Эристиин колхуос үбүлүөйүн мунньаҕар кытынна, «Чурапчы» ТХПК объектарын, оҥорон таһаарар сыахтарын көрдө, Одьулууннааҕы агротехникумҥа сырытта. Андрей Тимофеевич Петр Николаевиһы Хатылыга таһааран Көһөрүллүү музейын көрдөрдө. Маны таһынан Семен Андреевич Новгородов аатынан Чурапчы орто оскуолатыгар агрооскуолалар дириэктэрдэрин кытта көрсүһүү буолла.

Бу күн иккис аҥаарыгар министиэристибэ делегациятын бөлөхтөрө Одьулуун агротехникумугар мустан нэһилиэк баһылыктарын кытта мунньахтаатылар. Улуус бааһынай хаһаайыстыбаларын салайааччылара хамаанда тэринэн, ытыыга, канат тардыһыытыгар уонна волейболга министиэристибэ хамаандатын кытта илин – кэлин түһүстүлэр. Биир ахсаанынан кыайтаран, ыалдьыттарга кыайыы өрөгөйүн бэлэхтээтилэр.   Ити кэнниттэн үөрүүлээх быһыыга – майгыга министиэристибэни кытта Чурапчы улууһун дьаһалтата хардарыта үлэлээһиҥҥэ дуогабар түһэристилэр.

Бырабыыталыстыба Бэрэссэдээтэлин бастакы солбуйааччы, тыа хаһаайыстыбатын миниистирэ Петр Николаевич Алексеев улахан дьаһаллары түмүктүүр тыл этиитигэр: «Бүгүҥҥү кэпсэтиилэр, соруктары ырытыһыы уонна туруорсуулар, сүбэлэһиилэр анаан боротокуолланан, салгыы өссө ситимнээхтик, хардарыта өйөһөн үлэлиэхпит,» — диэтэ. Онон бу министиэристибэ улахан делегацията кэлэн барыыта улууспут инники сайдыытыгар, тыа хаһаайыстыбатын салаата өссө таһаарыылаахтык үлэлииригэр олук буолара саарбахтаммат. Биирдиилээн бааһынай хаһаайыстыбалар, улуустааҕы тыа хаһаайыстыбатын управлениетын специалистара кыһалҕаларын тириэрдэн, элбэх сүбэлэри ылбыттара эмиэ инники үлэҕэ улахан туһалаах буолара эрэйиллэр.

Улуус дьаһалтата сыл саҕаланыыта маннык тэрээһини ыыппыта улууспут сүрүн салаата эбии сайдарыгар, тыа хаһаайыстыбатыгар үлэлии – хамсыы сылдьар дьон санаата бөҕөргүүрүгэр кэскиллээх буолла. Онон махтанан туран, өссө түмсүүлээх үлэҕэ турунуоҕуҥ.

«Уйгу кыһата» сыһыарыыга эбии ыстатыйалар тахсыахтара, онон тэрээһин туһунан өссө  сиһилии билсээриҥ.

Автор: А.Захаров.