Чурапчытааҕы спорт институтун остолобуойугар «Алаас аһа» гастрономическай киэһээҥи аһылык ыытылынна. Бу сонун тэрээһин «Путешествие во времени: Вкусы предков» бырайыак чэрчитинэн, урбаанньыт Ульяна Заровняева көҕүлээһининэн улууска аан бастакытын буолла.
«Алаас аһа» диэн тэрээһин аатыгар да баарын курдук, менюга баар хас биирдии бүлүүдэ ингредиеныгар Чурапчы кыылларын этэ-үөлэ уонна алааска, тыаҕа үүнэр сүмэһиннээх үүнээйилэр туһаныллыбыттар. Ол курдук, сэлиэһинэй бурдуктаах саламаат, биир да уҥуоҕа суох буспут собо, балык мииниттэн дыраһааҥка, илдьи мэһиллибит сүбүөкүлэттэн тума уо.д.а. бииртэн биир ураты амтаннаах бүлүүдэлэри Саха сирин биллиилээх шеф- повардара «Усадьба Атласовых» ресторантан Николай Атласов, «Азимут» отельтан Денис Бурцев, «Парус» дьиэ кэргэн рестораныттан Михайло Власов, «Муус Хайа» ресторантан Антон Евграфов уонна «Республика» ресторантан су-шеф, бэйэбит ыччаппыт Петр Аммосов айан-тутан оҥордулар. Асчыттар кэлбит дьоҥҥо-сэргэҕэ бүлүүдэлэр хайдах оҥоһуллан тахсалларын көрдөрдүлэр, ас нөҥүө туох өйдөбүлү тиэрдэллэрин сырдаттылар.
Ульяна Заровняева, ааптар:
— Былырыын Өймөкөөҥҥө буолбут гастрономическай бэстибээлгэ сылдьан, Саха сирин бренд-шефын Николай Атласовы Чурапчыга ыҥырар санаа үөскээбитэ эрээри, чопчу идиэйэм суоҕа. Ол курдук аҕыйах кэм ааспыта. Онтон Мындаҕаайыга сэлиэһинэй бурдугу үүннэрэр Данил Павловы кытта үлэлэһэн, Чурапчы килиэбин буһаран саҕалаабытым. Урут өбүгэлэрбит сэлиэһинэй бурдуктан аһаан-сиэн олордохторо дии. Ону санаан, саламаат астаан боруобалаан көрбүтүм, наһаа үчүгэйдик табыллыбыта. Ол кэмҥэ аны оруобуна Прокопий Екечьямов туойунан оҥоруу маастар-кылааһыгар сылдьан, туой иһикка ас астыыр санаа киирбитэ. Онон туой иһиккэ саламаат, лэпииэскэ, балык миинэ, эт ас буһаран көрбүппүт, олус минньигэс, ураты амтаннаах буолан тахсыбыта. Онно дьэ, «Алаас аһа» диэн гастроужин идиэйэтэ киирбитэ. Буһарбыппытын барытын хаартыскаҕа түһэрэн Николай Атласовтаахха ыыппыппытын сэргээбиттэрэ. Онон хайдах эрэ үлэбит чэпчэкитик саҕаламмыта. Бу көҕүлээһиммитин улуус дьаһалтата, Чурапчы нэһилиэгин урбаанньыттара, «Мой бизнес» киин, улуустааҕы култуура салалтата, «Үөрүү» оҕо сайдар киинэ, олохтоох асчыттар сүүрэн-көтөн, киэргэтиитин тэрийэн, астааһыҥҥа көмөлөһөн, үбүнэн өйөөн олоххо киирдэ. Маннык улахан тэрээһини бары түмсэн кыайдыбыт диэтэхпинэ сыыспаппын. Түгэнинэн туһанан, бары көмөлөспүт дьоммор, кэлбит ыалдьыттарга махталбын тиэрдэбин. Инникитин да олохтоох оҥорон таһаарыыны сайыннарарга маннык түмсүүлээхтик үлэлиэҕиҥ-хамсыаҕыҥ. Тус бэйэм Чурапчыга үүнэр бурдугунан нэһилиэнньэни хааччыйар сыалтан улахан кыамталаах миэлиҥсэ ылар баҕа санаалаахпыт.
Бу ас культуратын көрдөрөр тэрээһиҥҥэ 80-ча киһи сырытта. Олор истэригэр Амматтан, Тааттаттан, Дьокуускайтан анаан-минээн кэлбит ыалдьыттар бааллар. Мустубут дьон-сэргэ уопсайа 6 бүлүүдэни амсайдылар. Кинилэр хас биирдии бүлүүдэни сөбүлээбиттэрин бэлиэтээтилэр.