Чурапчы нэһилиэгэр эдэр, элбэх оҕолоох дьиэ кэргэн үгүс. Үс оҕолоох Константин уонна Александра Седалищевтар дьиэ кэргэттэригэр бүгүн олус долгутуулаах ураты күн үүннэ. Өр сылларга ыра санаа оҥостубут баҕалара туолан, уу сахалыы “Амтан” диэн ааттаах атыы-эргиэн, дьон-сэргэ аһыыр, сынньанар лааппыларын үөрүүлээх арыллыыта буолла.
Бу иннинэ, 2020 сыллаахха диэри Константиннаах Александра иккиэн Чурапчы кээпэрэтиибэр үлэлээбиттэрэ. Ити сыл социальнай хантараак баарын истэннэр кыттыыны ыларга санаммыттара. Дьоллоох түгэн тосхойон бу көмө кинилэргэ анаммыта. Дьэ мантан кынат анньынан, Седалищевтар дьиэ кэргэн минньигэс астарын дьиэҕэ олорон астыыртан саҕалаабыттара.
2021 сыллаахха урбаанньыт аатын сүгэннэр, атыы-эргиэн киоскатын арыйан нэһилиэк олохтоохторун сылаастыы буспут шашлыгынан күндүлээн үлэлэрин тэтимин быспатахтара. Үлэтэ суохтарынан субсидия көрүллэн, үөрүүлэрэ өссө үрдээбитэ. Таһаарыылаах, үрдүк көрдөрүүлээх үлэлэрин иһин, 2023 сыл түмүгүнэн улуус Аҕа баһылыга Степан Саргыдаев анал Гранынан наҕараадаламмыттара.
Былырыын Чурапчыбыт нэһилиэгин килбэйэр киинигэр, Ленин аатынан болуоссакка “Форимрование комфортной городской среды” анал бырагыраамманан 35 мөл.сууммалаах субсидияны ылан, “Восток-Строй” ХЭТ үлэни тэтимнээхтик түмүктээн, болуоссаппыт көстүүтэ тупса түспүтүгэр нэһилиэкпит олохтоохторо үөрүүлэрэ үксээбитэ. Онтон Седалищевтар дьиэ кэргэттэригэр Чурапчы нэһилиэгэгин дьаһалтата бу “Амтан” лааппы көҥдөйө анаммыта биллэн туран урбаанньыкка улахан төһүү күүс буолар. Мантан салгыы Константиннаах Александра бэйэлэрэ көҥдөй ис үлэтин ылсаннар, аныгылыы быһыылаах гына толкуйдаан үлэҕэ киллэрдилэр.
Үөрүүлээх дьаһалга Чурапчы улууһун баһылыгын солбуйааччы Егор Сивцев, Чурапчы нэһилиэгин баһылыгын социальнай боппуруостарга солбуйааччы Варвара Макарова, “Мин бизнеһым” Чурапчытааҕы салаа салайааччыта Павла Слепцова кыттыыны ыллылар.
“Бастатан туран улууспут, нэһилиэкпит дьаһалталарыгар дириҥ махталбытын тириэрдиэхпитин баҕарабыт. Лааппы бэнидиэнньик-бээтинсэ күннэргэ сарсыарда 10 чаастан саҕалаан киэһэ 18 чааска диэри үлэлиир буолуоҕа, манна даҕатан эттэххэ урукку киоскабыт эмиэ үлэлиэҕэ. Манна дьон-сэргэ кэлэннэр көннөрү ас эрэ атыылаһан барбаккалар олорон аһыылларыгар эмиэ усулуобуйа тэрилиннэ. Төрөөбүт күннэри, кыра бырааһынньыктары тэрийэргэ сайаапкалары кыралаан хомуйан барыахпыт”, — диэн лааппы хаһаайката Александра Александровна санаатын үллэстэр.
Седалищевтар дьиэ кэргэттэригэр таһаарыылаах үлэни, бу тупсаҕай оҥоһуулаах сырдык лааппы өрүү толору оҕо-аймах үөрбүт саҥатынан, эдэр ыччат күлүүтүнэн, аҕам саастаахтар эйэҕэс мичээрдэринэн эрэ туоллун.