Ити туһунан Чурапчы улууһун баһылыга А.Т. Ноговицын олунньу 15 күнүгэр “Айылгы” култуура уонна духуобунай сайдыы киинигэр ыытыллыбыт суоппардарга анаммыт мунньах түмүгэр иһитиннэрдэ.
Мунньах, сүрүннээн, суолга тахсар алдьархайдары туоратар, суол быраабылатын кэспэккэ, дьон олоҕор куттал суох буолуутугар туһуланна. Суоппардары кытары кэпсэтиигэ Чурапчы улууһун Прокуратуратыттан юстиция лейтенана А.Р. Черкаева, Чурапчытааҕы полиция отделын начальнига, полиция подполковнига И.Д. Свинобоев, Чурапчытааҕы ОГБДД начальнига, полиция майора В.Д. Ефремов, Чурапчы улууһунааҕы гостехнадзор старшай инспектора В.Н. Сивцев, улуус баһылыгын 1-кы солбуйааччы А.А. Ноговицын, улуус баһылыгын үпкэ уонна инвестиция боппуруостарыгар солбуйааччы И.К. Матвеев, улуус баһылыгын социальнай уонна ис политика боппуруостарыгар солбуйааччы Н.И. Аммосов, улуус балыыһатын кылаабынай бырааһа А.И. Коркин кыттыыны ыллылар.
Чурапчытааҕы ОГБДД начальнига Василий Дмитриевич Ефремов ааспыт сыллаах үлэ түмүгүн иһитиннэрэн баран, улууска суоппардар, ол эбэтэр такси сулууспаларыгар линцензиялаах суоппардар сойуустарын тэрийиигэ этии киллэрдэ. Улуус прокуратуратыттан Альбина Руслановна бу этиини өйөөтө, итини сэргэ суоппардар айаҥҥа барыахтарын иннинэ, айан кэнниттэн кэлэн баран медосмотр ааһыыларын болҕомтоҕо ылан, сөптөөх быһаарыныыны ылыналларыгар сүбэлээтэ. Полиция отделын начальнига Иннокентий Дмитриевич бэйэ-бэйэҕэ харыстабыллаахтык сыһыаннаһарга, тэҥҥэ үлэлэһэргэ ыҥырда.
Кэпсэтиигэ суол үгүс быһылаана, алдьархай “көҥүлэ суох” ол эбэтэр “Индрайвер” приложениенан өҥөнү оҥоруу түмүгүттэн тахсарын эттилэр. Мунньахха 105 киһи сырытта. Маныаха үксүлэрэ — тэрилтэ салайааччылара, оскуола дириэктэрдэрэ, нэһилиэк баһылыктара, такси сулууспатын салайааччыта, биирдиилээн суоппардар. Чааһынай автобустаах суоппардар түмсүүлэрэ улуус киинигэр автовокзал аһылларын уонна кыра да буоллар, субдсидия көрүллэрин туруорустулар. Биирдиилээн суоппардар багажнигы кэтэргэ көҥүлү ылыыга, лицензия уонна медосмотр чааһыгар кэккэ санааларын эттилэр.
Маннык мунньах улууска иккис сылын тэриллэр. Бу кэпсэтиигэ улуус баһылыга Андрей Тимофеевич уонна мустубут дьон куоластааһынан такси суоппардарын түмсүүтэ тэриллэрэ быһаарылынна. Ол инниттэн бары суоппардар, таксистар, “Индрайвер” өҥөтүнэн туһанар суоппардар, пассажирдар бу боппуруостартан туора турбакка, ис дьыала уорган салайааччыларын кытары биир тылы булан, уопсай сүбэнэн биир тэҥҥэ үлэлэһиэҕиҥ. Уруккуттан олоҕурбут хобуоччулааһын, норуокка биллэринии, “стукачтааһын” диэн буолбакка, сыыһа өйдөбүлгэ ыктарбакка, оҕолорбут, чугас дьоммут, аймахтарбыт, доҕотторбут туһугар диэммин, биир өйгө-санааҕа түмсэр кэммит кэлбитин табатык өйдүөҕүҥ. Түмсүү сүрүн сыала сокуоҥҥа киирбит уларыйыылары, суоппардар мунаарар боппуруостарын быһаарыыга, өйдөһөн, көмөлөсүһэн үлэлииргэ туһаайыллыаҕа. Бэйэ-бэйэҕэ убаастабыллаахтык сыһыаннаһыы, кимиэхэ эрэ болҕомтону ууруу дьон-аймаҕы хаһан даҕаны иэдээҥҥэ тэппэтэҕэ.
Автор: Семен Жендринскэй