Новости
Чурапчы мүөтүнэн эмиэ биллэр
8 ноября 2021

Саха сиригэр Чурапчы улууһа минньигэс этинэн, иҥэмтиэлээх ынаҕын арыытынан биллэр эбит буоллаҕына, кэлиҥҥи бириэмэҕэ айылҕа мүөтүнэн эмиэ биллэр. Маннык ураты, киһи доруобуйата бөҕөргүүрүгэр олус туһалаах бородууксуйаны Чурапчы улууһун Арыылаах нэһилиэгин олохтоохторо Елизавета Валентиновна уонна Николай Иванович Поповтар дьиэ кэргэн, үһүс сылларын ылаллар.

Ылаллар диэн бу сөптөөх этии. Ыал Аҕа баһылыга, урбаанньыт Николай Иванович: “Тигээйилэри үһүс сылбытын иитэбит, иккис кыстыктарыгар баран эрэллэр. Төгүрүк сыл 7 уйаны көрөбүт, кыһыҥҥы бириэмэҕэ кинилэр бытаараллар, атын үөн-көйүүр курдук ньимиччи утуйан хаалбаттар, хаһан баҕарар уһуктуохтарын сөп. Төгүрүк сайын көрөбүт-истэбит, манна ордук оҕолорбут күүс-көмө буолаллар. Мүөтү 1-кы Ыспааһап (“Медовый Спас”) кэмигэр кубатенер диэн иһиккэ күүскэ хомуйабыт, тугу даҕаны буккуйбакка бэйэтинэн атыылыыбыт.

Саха сирин мүөтэ ханна баҕарар киилэтэ 2000 тыһ.солкуобай буолар. Ол аата 500 грамм – 1000 тыһ.солкуобай. Билиҥҥи туругунан мүөппүтүн атыылаан бүтэрэн эрэбит. Бэйэбит айылҕабыт мүөтэ наһаа минньигэс буолар, киһи сиэн бара туруох курдук.

Ким баҕалаахха, тигээйини сөпкө иитэргэ сүбэ-ама биэрэбит. Мүөтү тигээйилэр оҥорон таһаараллар, биһиги ылабыт. Кыыспытын Виканы өрөспүүбүлүкэҕэ бастакы пчеловод оҕо диэн ааттыахха сөп.

Толору үлэлиир, үгүһү билэр, бэйэтин баҕатынан үөрэнэр. Быйыл саас кырачааттарга анаан тигээйи туһунан билиһиннэрээри, остуоруйа суруйан, кинигэ оҕотун таһааттарбыппыт”, — диэн аһаҕастык ирэ-хоро кэпсиир.

Поповтар дьиэ кэргэн туһааннаах дьарыктара сыыйа сайдан, улуустан саҕалаан өрөспүүбүлүкэҕэ тиийэ тарҕанарыгар баҕарыаҕын.

Источник