Олунньу 8 күнүгэр Эдьигээн оройуонугар СӨ Ситэриилээх былааһа 2021 сылга ыыппыт үлэтин-хамнаһын туһунан иһитиннэриитин видео сибээс нөҥүө тахсан сырдатта. Мунньахха Эдьигээн оройуонун, нэһилиэктэрин дьаһалтата, депутаттар, тэрилтэ салайааччылара, общественнай сэбиэт кыттыыны ыллылар. Отчуот кэнниттэн улуус өттүттэн ыйытыылар, туруорсуулар киирдилэр. Хаһыат ааспыт нүөмэригэр сүрүн этиилэр тустарынан ыстатыйа нууччалыы тылынан толору суруллубута. Салгыы онно киирбэтэх боппуруостары ааҕыҥ.
Бу күн оройуон баһылыга Василий Сорокин Эдьигээн-Кыстатыам хайысханан кыһыҥҥы суолу оҥоруу, хааччыйыы улуус дьаһалтатыгар сүгэһэриллэрин эттэ. Онуоха хаачыстыбалаах суолунан хааччыйыыга олохтоох бюджеттан тыырыллыбыт үп тиийбэтин, сөптөөх техника суоҕун ыйда. Онон бу кыһыҥҥы суолу өрөспүүбүлүкэ бас билиитигэр, хааччыйыытыгар киллэрэр сатаныа дуо диэн этиитин киллэрдэ. Бу ыйытыыга СӨ Үлэҕэ уонна социальнай сайдыыга миниистирэ Елена Волкова маннык хоруйу биэрдэ: «Мин улуус туруорсар боппуруостарын эрдэ ылан көрбүтүм, онон СӨ Тырааныспар уонна суол хаһаайыстыбатын министерствотыттан туоһуласпытым. Онуоха туһааннаах министерство бу боппуруоһу көрөр былааннааҕын эппитэ, докумуоннары көрүү өттүгэр улуус дьаһалтата Дьокуускайга кэлэн сирэй көрсөн кэпсэтэрэ ордук диэн тириэрдибиттэрэ».
Салгыы төрөппүт актыыбын аатыттан «Елочка» уһуйаан сэбиэдиссэйэ Евдокия Иванова 160 миэстэлээх саҥа уһуйаан тутуутун туруоруста. 2022 сыл бастакы аҥарыгар “Дэвэлчэн” уонна «Елочка» уһуйааннар силбэһэн биир оҕо тэрилтэтэ буолуохтаахтар. Оччоҕуна уһуйаан 5 дьиэнэн арахсан үлэтин салгыы ыытыахтаах. Бу дьиэлэр 1959, 70-80 сс. тутуулар, аныгы олох ирдэбилигэр эппиэттээбэттэр, ол курдук муусукаҕа, физкультураҕа оҕолору дьарыктыыр саалалара суохтар. Дьиэлэр эргэрэн тымныы кэмнэргэ санитарнай нуормаҕа эппиэттээбэттэр. Сылын аайы уһуйаан дьиэлэрин тупсарыыга үлэһиттэр, төрөппүттэр өрөмүөн үлэтин ыыталлар. Үөрэхтээһин министерствота маннык хоруйу биэрдэ: «2021 сыл муус устарыгар улуус биэрбит сайаапкатынан, оройуоҥҥа бастакы уочарат Эдьигээн орто оскуолатын, иккис миэстэҕэ Баахынай оскуола-уһуйаанын, үһүс миэстэҕэ «Звездочка» уһуйаанын, төрдүс миэстэҕэ «Елочка» уһуйаанын тутуулара тураллар. Сылын аайы өрөспүүбүлүкэ үрдүнэн саҥа тутуу бардаҕына, биллэн туран, уочарат эмиэ сыҕарыйар. Урукку сайаапканан ылан көрдөххө Кыстатыамҥа таас оскуола-уһуйааҥҥа тутуу түмүктүүр үлэлэрэ ыытылла тураллар. Өрөспүүбүлүкэҕэ оскуолалары, уһуйааннары тутууга бу дьыл муус устар ый бүтүөр дылы саҥа уочарат бэрээдэгэ тахсыахтаах. Билиҥҥи туругунан ураты болҕомтоҕо. Эдьигээн орто оскуолатын уонна Лииндэ оскуола-уһуйаанын тутуулара тураллар».
Оройуон дьаһалтатын тутуу отделын салайааччыта Софья Ефремова Эдьигээҥҥэ Р.М. Дмитриев аатынан спортивнай саала тутуутун саҕалааһынын туһунан ыйытта. 2021 сылга Судаарыстыбаннай сакаас сулууспата бу спортсаала бырайыагын, сметатын докумуонун түмүктээбит, ону сэргэ судаарыстыбаннай экспертизаттан сөбүлэҥи ааспыт. 2024 сылга сахалартан бастакы Олимпийскай чемпион, Эдьигээн улууһуттан төрүттээх Р.М. Дмитриев төрөөбүтэ 75 сылын туолар диэн тоһоҕолоотулар, онон өскөтүн 2022 сылга тутуу саҕаланнаҕына 2024 сылга түмүктэнэр кыахтаах этэ. СӨ экономика министерствотыттан маннык эппиэт кэллэ: «Р.М. Дмитриев аатынан спортивнай саала тутуута инвестиционнай программаҕа киирэригэр, кыттыгас үбүлээһин өттүттэн федеральнай таһымнаах программалартан өйөбүл ылыахтаах. Онуоха СӨ физическэй култуураҕа уонна спортка министерствотын кытта улуус дьаһалтата күүстээх үлэни ыытыахтаах».
Өрөспүүбүлүкэҕэ атыы-эргиэн логистическэй кииннэрин тутууга федеральнай бюджеттан үп көрүллүбүт, быйыл былаан быһыытынан 4 итинник центр тутуллуохтаах, олортон биирдэстэрэ Эдьигээн нэһилиэгэр. Бу дьаһал «Поддержка традиционной хозяйственной деятельности КМНС» судаарыстыбаннай программанан ыытыллар. Быйылгыттан Арктиканы сайыннарыы министерствотыгар факториялары тэрийэргэ нормативнай-правовой базалары оҥорууга сорудах бэриллэн турар, бу ситим атыы-эргиэн логистическэй киинигэр сыһыарыллыахтаах. Оччотугар бу атыы-эргиэн логистическэй кииҥҥэ олохтоох общиналар бэйэ бородууксуйатын туттарар, атыылатар кыахтаныахтара.