“Миэхэ Элгээйи бэчиэнньэтин ыытаар эрэ” диэн биһиги, сунтаардар, үгүспүт сорудах ылан, Дьокуускайынан, хотунан-соҕуруунан олорор оҕолорбут, дьоммут сорудахтарын толорон маҕаһыынтан элбэхтик атыылаһан, элгээйилэргэ үлэһэн ыытар минньигэспит. Дьон сөбүлээн сиир бэчиэнньэтин “Астык” кондитерскай сыах астаан атыыга таһаарар.
«Астык” кондитерскай сыахтаах, бэкээринэлээх тэрилтэни Элгээйигэ 2015 сыллаахха индивидуальнай предприниматель Туйаара Владимировна Иванова арыйбыта.
Бүгүн Туйаара Владимировна ас-үөл бырамыысаланнаһын үлэһиттэрин күнүнэн улуус бары биэкэрдэрин, кондитердарын эҕэрдэлээн туран, тэрилтэтин туһунан кылгастык маннык кэпсиир:
— Биһиги “Астык” бастаан аһылларыгар 4 кондитер, 1 биэкэр уонна бэйэм атыылааччы быһыытынан үлэлээбиппит. Олохтоохтор биһиги бурдук аспытын олус сөбүлээн атыылаһар буолбуттара, элбэхтик сакаас да киирэр этэ.
Билигин кэҥээн, улаатан 22 үлэһиттээхпин. Элгээйигэ, Хороҕо, Кутанаҕа, Сунтаарга “Тандем” атыы-эргиэн киинигэр бородууксуйабытын атыылыыр туочукалардаахпыт. Маны сэргэ Түбэйгэ, Түбэй Дьаархаҥҥа, Сиэйэҕэ, Күндэйэҕэ, Сунтаарга “Виктория”, “Корона”, “Туймаада”, “Альфа”, “Дэли” маҕаһыыннарга туттаран атыылатарбытын дьон-сэргэ хамаҕатык ылар. Дьокуускай куоракка “На Петровского” маҕаһыыҥҥа илдьэн эмиэ атыылыыбыт.
Сыахпытыгар билигин бурдук аһын 50 көрүҥүн буһаран, астаан, нэһилиэнньэни хааччыйан олоробут. Тэрилтэм үлэһиттэрэ бары олус асчыттар, үлэһит дьон. Ол да иһин тэрилтэбит үүнэр-сайдар, дьон биһиги бородууксуйабытын сөбүлээн ылар.
Биэкээринэбитигэр килиэп үс арааһын астыыбыт. Ол курдук, үрдүк суортаах бурдуктан үрүҥ килиэп, хара уонна комбинированнай килиэп. Биэкэрбит Григорьева Валентина Васильевна олус асчыт, талааннаах киһи. Кини килиэп эрэ астыыр буолбатах, сатаабат аһа диэн суох. Актыбыыс бэрдэ. Тэрилтэ, нэһилиэк уопсастыбаннай олоҕор көхтөөхтөк кыттар. 2017 сыллаахха улууспутугар Тыа сирин үлэһит дьонун сыла биллэриллибитэ. Онно кини биэкэрдэр куоҥкурустарыгар «Бастыҥ биэкэр» ааты ылан, Сунтаар киинигэр Бочуот дуоскаҕа тахсан, улуус олохтоохторун, ыалдьыттарын көрүүтүгэр, билиитигэр турбута. 7 үлэһиттээх кондитерскай сыахпытын Акимова Анна Афанасьевна салайар. Манна күннэтэ минньигэс бэчиэнньэ, рулет, торт уо.д.а. араастара астыыллар. Бурдук аһын арааһа — бэрэски, хачапури, пицца атыыга таһаарабыт. 2020 сыллаахха улууска ыытыллыбыт кондитердар күрэхтэригэр сыахпыт бастыҥ үлэлээх буолан харчынан бириэмийэлэммитэ.
Биһиги тэрилтэбит хайа күн аһыллыаҕыттан Ангелина Петровна Федорова, Наталья Евгеньевна Пахомова кондитердарынан, Валентина Васильевна Григорьева биэкэр-кондитерынан таһаарыылаахтык үлэлииллэр.
Үлэһиттэрим бары идэлэрин чахчы баһылаабыт дьон. Бары мэлдьи сатабылларын, билиилэрин кэҥэтэ сылдьар дьон. Бары бииргэ түмсэн сүбэлэһэн тэрилтэбитигэр саҥаны мэлдьи киллэрэргэ кыһанабыт. Холобур норуот сөбүлээн атыылаһар, сакаастыыр бородууксуйатынан” Элгээйи бэчиэнньэтэ” аатырар. Сотору эриэхэлээх, сакааттаах бэчиэнньэ атыыга таһаарыахпыт. Быйыл саҥа крафт кумааҕыттан оҥоһуллубут эко-пакет сакаастаатыбыт. Онон бородууксуйабыт саҥа упаковкаҕа сууланан атыылаһааччыларбытыгар тиийиэҕэ.
Күндү атыылаһааччылар, эһиэхэ эрэ анаммыт бурдук ас астыгын Элгээйитээҕи “Астык” тэрилтэттэн атыылаһыҥ!
“Астыктарга” аскыт арааһа дэлэйдин, дьон-сэргэ эһиги аскытын астына атыыластын диэн баҕа санаа бастыҥын этэбит.