Новости "Центра "Мой бизнес"
Биисинэскэ ситиһии төрүөтэ харса суох буолууга сытар
2 декабря 2022

Биһиги бүгүҥҥү геройбут массыына уруулуттан илиитин араарбатаҕа сүүрбэттэн тахса сыл буолла.Чапчылҕан олохтооҕо Егор Каримов билиҥҥи кэмҥэ судаарыстыба өйөбүлүнэн бэйэ биисинэһин саҕалыахха, эбэтэр сайыннарыахха сөбүн биир чаҕылхай холобура.

Егор Каримов Алтаннааҕы ПТУ-ну бүтэрэн суоппар идэтин баһылыаҕыттан атын ханнык да эйгэ кинини букатын умсугуппат. Бу кэм тухары КамАЗ массыынатынан хас тыһыынча килэмиэтири тилийэ сүүрбүтүн, хас улууһу уҥуордаабытын ким аахпыта баарай? Тутуу матырыйаала, таас, буор, чох, онтон да атын таһаҕас таһыытыгар хаһаайынын эрэллээх тимир көлөтө кинини хаһан даҕаны түһэн биэрбэтэҕөэ. Ол да буоллар, олох сайдан иһэр, онон ырыынак саҥа ирдэбиллэригэр эппиэтиир инниттэн Егор Егорович биир сыл анараа өттүгэр урбаанньыт быһһыытынан бэлиэтэнэн саҥалыы үлэлээн саҕалаата.

-„Мин биисинэһим“ киин нөҥүө, Владимир Владимирович Колосов сүбэтинэн урбаанньыт буолбутум. Бу киин көмөтүнэн лизининэн кыра бырыһыаннаах кирэдьиит ылар кыах баарын эмиэ киниттэн билбитим. Үгүс бааннар 18% харчыны иэс биэрэр эбит буоллахтарына, „Мин биисинэһим“ бииргэ үлэлэһэр бааныттан биэс сыл болдьоххо 10% ыллым. Аны аан бастааҥы усунуос ирдэммэтэ эмиэ табыгастаах. Бу харчыбынан ү сабыс саҥа FAW массыыналары Благовещенскайтан сүүрдэн аҕаллыбыт. Улахан уйуктаах тиэхиньикэнэн үлэлиир табыгастаах буолуо диэн, үлэһиттэри наймылаһан сайдар, үлэбин кэҥэтинэр санааттан бу массыыналары ылынным. Билигин Саха сирин тымныыларын тулуйар гына ититэр бүрүөһүннүү сылдьабыт,- диэн кылгастык сырдатар.

Онон, бэйэ дьыалатын кэҥэтиэн, сайыннарыан баҕалаах дьон маннык судаарыстыбаннай программаларга толлубакка киирсэн иһиҥ, үлэлээҥ диэн Егор Егорович сүбэлиир.

Источник