Соморсун — тыа хаһаайыстыбатын утумнаахтык сайыннарыыга күүскэ үлэлиир нэһилиэктэртэн биирдэстэрэ. Ахсынньы аам-даам тымныыта сатараан турдаҕына биир күн икки сылгы базата үлэҕэ киирэн инники сайдыыга чиҥ олук уурулунна.
Ахсынньы 16 күнүгэр бастакы үөрүүлээх түгэн «Үрүйэ» хаһаайыстыбаҕа буолла. «Улахан алаас» туонатыгар 300 сылгыга аналлаах аныгылыы база аһылынна.
Алгыс сиэрин-туомун Антонина Михайловна Степанова алгыстаах алаадьынан, саламаатынан аал уоту айах тутан толордо. Ол кэннэ бу бырайыагы олоххо киллэрбит Адамов Артур Васильевич уонна кини биригээдэтэ хаһаайыстыба салайааччытыгар Кононов Семён Алексеевичка символическай күлүүһү туттардылар.
Бу тэрээһиҥҥэ Амма улууһун тыатын хаһаайыстыбатын управлениетын салайааччыты Ион Семёнович Кононов, племзоотехнига Олег Олегович Егоров, улуус кылаабынай зоотехнига Спиридон Семёнович Капитонов, бааһынай хаһаайыстыбалар ассоциацияларын бэрэссэдээтэлэ Александра Николаевна Цыпандина кэлэннэр бэйэлэрин эҕэрдэ тылларын этэн, хаһаайыстыба өссө да сайда, кэҥии турдун диэн баҕа санааларын эттилэр. Ону тэҥэ олохтоох дьаһалта баһылыга Алексей Юрьевич Кононов эҕэрдэ тылын эттэ. База федеральнай субсидия көмөтүнэн олоххо киирдэ. Ол курдук «Үрүйэ» хаһаайыстыба ааспыт сыл ахсынньытыгар «Субсидия на финансовое обеспечение части затрат на развитие мясного табунного коневодства» диэн федеральнай бырагыраамаҕа СӨ тыатын хаһаайыстыбатын министиэристибэтин нөҥүө кыттыбыта. Онно барыта табыллан 3 мөл. солк. субсидия кэлбитэ. Манна үлэлиир усулуобуйа барыта тэриллибит. Ол курдук күрүө-хаһаа, баанньык, гараж, дьиэ-уот барыта тутулунна. Күн батареятынан электричество хааччыллар.
Бу тэрээһини бэйэлэрин ылбаҕай ырыаларынан-тойуктарынан култуура үлэһиттэрэ Туйаара, Айаал Белолюбскайдар уонна Ньургун Гоголев киэргэттилэр.
Урбаанньыт, КФХ баһылыга Караканов Алексей Афанасьевич 2021 с. «Семейный фермер» Граҥҥа 10 мөл. солк. ылан, быйыл Бэрэҕэ «Баллай» диэн учаастакка 200 сылгыга анаммыт базатын үлэҕэ киллэрдэ. Икки этээстээх дьиэ, 3 секциялаах гараж, баанньык, күрүө-хаһаа – бу эбийиэктэри барытын улахан кыамталаах күнүнэн ииттэриллэр батарея хааччыйа турар.
Алексей Караканов саҥа базатын арыллыытыгар Ион Кононов, Александра Цыпандина, Спиридон Капитонов, Олег Егоров, Алексей Кононов, Антонина Степанова алгыс этэн салама бэлиэ иилээн, эҕэрдэ тылларын этэн ыалдьыттаатылар. Алексей Каракановка уонна кини үлэһит уолаттарыгар өссө төгүл эҕэрдэ, үлэҕит таһаарыылаах, үрдүк көрдөрүүлээх буоллун!
