Бүгүн СӨ экономикатын миниистирин солбуйааччы Александр Афанасьев, министиэристибэ Департаменын үлэһиттэрэ Анастасия Реева, Мичийэ Саввина Горнайга үлэлээтилэр. Кинилэр күн бастакы аҥаарыгар Маҕараска офиснай киин үөрүүлээх арыллыытыгар ыалдьыттаатылар. Үлэни-хамнаһы кытары билистилэр.
Бэрдьигэстээххэ улуус баһылыга Никита Андреев кытары Федор Попов “Южнай” производственнай базатын көрдүлэр. Олохтоох урбаанньыт атыы-эргиэн хаамыытын, туох былааннааҕын билиһиннэрдэ. Бизнес эйгэтигэр баай уопуттаах киһи нэһилиэнньэ туһугар оҥорор үлэтин үрдүктүк сыаналаатылар. Дьон-сэргэ туһугар ыытар үлэтигэр махтаннылар.
Улуус дьаһалтатын аактабай саалатыгар Александр Афанасьев урбаанньыттары кытары көрүстэ. Олохтоох бэйэ оҥорор таһаарыы сирин-уотун сайыннарыыга бэйэлэрин былааннарын кэпсээтилэр, урбаанньыттар санааларын иһиттилэр. Урбаан сокуонугар кэккэ хайысхаларга өйдөммөт боппуруостар баалларын ырытыстылар.
Биир үөрүүлээх түгэнинэн өрөспүүбүлүкэҕэ саҥа киирэн эрэр “олохтоох бэйэ оҥорор таһаарыы сирин-уотун сайыннарыыга” бэһис резидент аатын ылбыт Федор Поповка анал сибидиэтэлистибэни туттарыы буолла. Биһиги улууска итинник хайысхалаах үлэ Одунуга, Октябрьскайга, Мытаахха, Кировскайга ыытыллыахтаах.