Бэрдьигэстээххэ саҥа «Aigu Eva» салон олохтоохторго аанын тэлэччи арыйда. Бу өрөспүүбүлүкэҕэ да сэдэх өҥөнү оҥорор салону улуус ыччата, Любовь, Дмитрий Винокуровтар урбаанньыт дьиэ кэргэн кыра кыыстара Айгылаана Андреева арыйда.
Бу күн саҥа салон хаһаайкатын үөрүүтүн үллэстэ, үөрүүлээх, долгутуулаах малааһынынан күүс-көмө буолбут дьоно, аймахтара, дьүөгэлэрэ кэлэн эҕэрдэлээтилэр.
Улуус баһылыгын солбуйааччыта Сардаана Стручкова «Айгылаана салонун арыйарыгар социальнай контракт тирэх буолла. Ол эрэн ылбатаҕа да буоллар, кини бу студиятын хайаан да арыйыахтаах этэ. Ол курдук кини хараҕа уоттаах, идэтигэр бэриниилээх», — диэн бэлиэтээн эттэ.
«Бизнес-инкубатор» салайааччыта Александра Никифорова Урбаан сылынан, улууспутугар эдэр урбаанньыттар ыра оҥостубут баҕа санааларын олоххо киллэрэллэрэ үтүө холобур буолар диэтэ.
Онтон күндү төрөппүттэрэ оҕолоругар бүгүҥҥү үөрүүлээринэн эҕэрдэлээн туран, ыал аҕатыгар Иннокентийга куруук бу курдук бэйэ-бэйэҕитин өйдөһө, өйөһө сылдьыҥ диэн истиҥ алгыстарын анаатылар.
Аалай кыһыл лиэнтэни салон хаһаайката Айгылаана быһан, ыалдьыттарга оҥорор өҥөтүн сиһилии көрдөрдө. Ол курдук, бу салоҥҥа LPG массаж, төбөҕө, баттахха спа процедура, перманентнай уонна сирэй макияһын өҥөлөрүн туһанаҕыт.
Айгылаана бу эйгэҕэ үлэлээбитэ хас да сыл буолла. Кини идэтигэр олус бэриниилээх, элбэхтик үөрэнэр, сайдар, онон хайаан даҕаны элбэҕи ситиһиэ диэн бүк эрэллээхпит. Улууспутугар урбаан сылынан өссө биир кэрэ салона арыллыбытынан итиитик-истиҥник эҕэрдэлиибит.