Константин Моякунов урбаанньыт эрэ буолбакка элбэх о5олоох а5а, таптыыр кэргэн уонна күндү эhээ. «Мария» диэн ааттаах чааһынай бэкээринэни 2008 сылтан арынан Мэҥэ Алдан олохтоохторун аhатан олорор.
Кэлиҥҥи сылларга нэһилиэк аайы бэйэ дьыалатын тэринэн үлэлии сылдьар киһи үгүс. Социальнай хантараагынан бэйэлэрин дууһалара сытар үлэлэригэр таба тайанан, дьоҥҥо-сэргэҕэ туһалыыр дьон ахсаана биллэ элбээтэ.
Мэҥэ Алдан нэһилиэгэр саҥа «Mария» диэн ааттаах чааһынай бэкээринэ үлэтин саҕалаата. Бэлиэтээн эттэххэ, нэһилиэккэ чааһынай бородуукта маҕаһыыннара чугас эҥэр улуустартан килиэп аҕалан атыылыы сылдьыбыттара. Онон бэйэ киһитэ бэкээринэ аспыта бары өттүнэн көдьүүстээх, үтүө дьыала буоллаҕа.
Урбаанньыт Константин Моякунов бэйэтэ Мэҥэ Алдантан төрүттээх. Аҕата Николай Моякунов Ленскэй улууһуттан төрүттээх. Ийэтэ Акулина Колодезникова төрүт Мэҥэ Алдан олохтооҕо.
Константин бэйэ дьыалатын 2008 сылтан арыммыта.
«Бастаан олохтоох дьаһалтаттан сир учаастага быстаран, дьиэ көҥдөйө атыылаһан, туттан, ас маҕаһыына аспытым», — диэн кэпсиир.
Былырыын саас ИП Захаров Д.Д. бэкээринэтин сабар үһү диэн биллибитигэр, олохтоох дьаһалта баһылыгын солбуйааччы Олимпиада Колодезникова Константиҥҥа телефоннаан, быһаччы: «Саҥа бэкээринэ аспаккын дуо?»- диэн модьуйуу курдук сүктэрэн кэбиспит.
«Кэргэмминээн Мариялыын сүбэлэһэн, ааҕан-суоттаан баран, син ылсыахпытын сөп эбит диэн түмүккэ кэлбиппит. Сайыҥҥыттан саҕалаан, сыыйа эргэ маҕаһыыммыт дьиэтин өрөмүөннээн, бэлэмнэммитинэн барбыппыт. Үп-харчы кырыымчыгыттан, барыта тутатына кыайтарбатаҕа», — диэн этэрэ.
Олимпиада Колодезникова көмөтүнэн, улуус дьаһалтатыттан 500000 солкуобай «На финансовое обеспечение части затрат субъектам малого и среднего предпринимательства, занятых производством хлеба» диэн субсидияны уонна ити курдук аналлаах 265000 солкуобайдаах субсидияны улуустааҕы тыа хаһаайыстыбатын салаатыттан куонкурсу ааһан, алтынньы уонна сэтинньи ыйдарга ылбыттар. Тутатына бэкээринэҕэ аналлаах сэби-сэбиргэли анал собуоттан сакаастаабыттар, уонна тохсунньу ыйга кэлбит. Ол кэннэ халлаан сылыйарын кэтэһэн, кииннэммит ититиигэ холботторон, бэкээринэ ис үлэтин барытын ситэрэн баран, бастакы килиэптэрин Улуу Кыайыыны уруйдаан, ыам ыйын 9 күнүгэр таһаарбыттара. Килиэп буһарааччылара урукку өттүгэр бэкээринэлэргэ үлэлии сылдьыбыт анал үөрэхтээх Матрёна Тарасова диэн.
Урбаанньыт кэргэнэ Мария Моякунова Уус-Алдан Бээрийэтиттэн төрүттээх. 2021 сыллаахха ыал буолбуттар. Бэйэтэ урбаанньыт, дьону кытта үлэлиир, салайар үөрэхтээх. Маҕаһыыны, бэкээринэни, үлэһиттэри — барытын кини салайар. Түөрт оҕолоохтор уонна биир сиэннээхтэр. Улахан кыыһа Лена — урбаанньыт, Москваҕа олорор. Дьокуускайга биисинэстээх, хас да хайысханан үлэлиир. Биир кыыс Кытайга, биир кыыс Казахстаҥҥа үөрэнэллэр. Уоллара Дьокуускайга үлэһит.
Константин инники былаана — бэкээринэҕэ минньигэс бурдук астары буһаран атыылааhын.
«Туохтан да чаҕыйбакка, куттаммакка, бастакытын саҕалыахтарын уонна тиһэҕэр диэри тириэрдиэхтэрин наада», — диэн сүбэ биэрдэ.
Региональный Центр «Мой бизнес» оказывает поддержку предпринимателям по национальному проекту «Эффективная и конкурентная экономика». Подробнее о мероприятиях, конкурсах, мерах государственной поддержки, выставках вы можете узнать на информационных ресурсах учреждения: Телеграм, ВКонтакте, Одноклассники, на портале Мойбизнес14.рф, а также по телефону горячей линии: 8(800)100-58-80.