Бэс ыйын 7 күнүгэр Дьокуускайга дойдубутугар Россия норуоттарын сомоҕолоһууларын уонна Саха Сиригэр культура сылларыгар аналлаах өрөспүүбүлүкэбитигэр олорор норуоттар чэй иһэр культураларын, сиэрин-туомун бастакы фестивала буолан ааспыт.
Тэрээһини СӨ норуоттарын ассамблеята, СӨ ресторатордарын ассоциацията, паарка уонна общественнай эйгэ дирекцията, «Саха сиригэр оҥоһулунна» урбаанньыттар ассоциацията көҕүлээн ыыппыттар.
Нам улууһуттан СӨ «Ыалдьытымсах буолуу» ассоциациятын ыҥырыытынан Таастаахтан Елена Келина — Отуор бэйэтин уопутун үллэһиннэ, төгүрүк остуолга олорон кэпсэтиигэ, санаа үллэстиигэ кытынна. Улууспутугар «Эҥсиэли хочотун минньигэс чэйэ» диэн түмсүү тэриллибитэ. Елена Валерьевна бэйэтэ төрөөбүт дойдутун алааһыттан эмтээх уонна туһалаах отторуттан чэй оҥоруунан дьарыктаммыта 15 сыл буолбут. Араас тэрээһиннэргэ, быыстапкаларга, маастар кылаастарга көхтөөхтүк кыттар, уопутун тарҕатар.