Амма нэһилиэгэр Василий уонна Марфа Харитоновтары бука билбэт киһи суох буолуо. Кинилэр дьиҥ чахчы сиртэн силистээх-мутуктаах сир дьоно. Бүгүҥҥү күн кинилэргэ байанайдаах буолбутун ыал далбар хотуна Марфа Алексеевна бу курдук сэһэргиир.
Билэргит курдук кус көҥүллэммитэ аҕыйах хонно. Ону эрэ күүтэн турбут курдук киэһэлик олбуорга таҕыстаххына дөрүн-дөрүн саа тыаһа иһиллэр. Ону истэн „ок, байанай тохсойдо буолуо да“ дии санаан саҥа аллайаҕын. Дьэ тосхойуон да сөп. „Кэнчээри“ бааһынай хаһаайыстыбаны үлэлэтэр Марфа уонна Василий Харитоновтар элбэх оҕолоох улахан дьиэ кэргэн. Хас да сиэннээхтэр. Бүгүҥҥү күн Харитоновтар дьиэ кэргэҥҥэ байанайдаах буолла.„ Кустуу кыра уолбут Вася баран өттүк харалаах кэллэ. Кэргэнинээн Дианалыын сарсыарда эрдэ баран кэрийэн кэлбиттэрэ. Дьэ онно байанай тосхойон кустаах кэллэ.
Онтон орто уолбут Киэсэ Быллараат диэн күөлгэ кус көрбүт. Ытаат таппыта, ууга түспүтүн, ыта Мээчик булбут. Тымныы ууга киирэн, харбаан, хата таһаарбыт. Инньэ гынан хайҕанна. Аны куспут кэнниттэн кыргыттар Сардааналаах Рея Үрүҥ Күөл чараҥыттан тэллэйдээбиттэрэ.
Ону дьэ саарылаан эбэтэр буһаран баран сойутан кыһыҥҥыга уурабыт. Тутатына сибиэһэй хортуоппуйу кытта сиэхпитин да сөп. Быйыл эрдэ быспыт хаппыыстабытын батараары маҕаһыыннарга эрийтэлээн көрөбүт да, биир да маҕаһыын ыла илик. Онон дьиэбитигэр атыылыыбыт. Сыанабыт олох удамыр. Холобура хаппыыстаны киилэтин 80 солк.биэрэбит. Дьыла хайдах эрэ дуу, мөкү сиэмэ түбэспит дуу? Золотой гектар диэн суорт хаппыыстабыт хайдар аҕай, ол иһин маҕаһыыннар ылаллара буоллар быһан иһиэ этибит. Дьиҥинэн минньигэс бөҕө суорт. Маҕаһыыннарга Аллараа Бэстээхтэн ханнык сыанаҕа ылаллар да, оннук сыанаҕа биэриэ этибит. Быйыл хаппыыстабыт элбэҕэ суох. Онон барыта дьоҥҥо тиийэн ас буолара буоллар бэрт буолуо этэ, — диэн Марфа Алексеевна санаатын үллэстэр.
Үлэ киһитэ сайын устата бүөбэйдээн кэлбит үүнээйилэрин олох удамыр сыанаҕа атыылыыр. Онон ким оҕуруота суох кэлэн ылыахтарын, бэйэлэрэ кэнсиэрбэлиэхтэрин сөп. Харитоновтар уһаайбаларыгар хаппыыстаны 80 солк, араҥас дьүһүннээх кабачогу 100 солкуобай атыылыыллар.
Маны сэргэ үлэһит ыал Харитоновтар кэтэх хаһаайыстыбаларын эспэккэ эмиэ көрө-истэ, бэйэ бородууксуйатын дэлэтэ сылдьаллар.
Ол курдук холобура кинилэртэн тиийэн үүт, суорат, иэдьэгэй атыылаһыахха сөп. Бэйэ бородууксуйата минньигэс да буоллаҕа эбээт!