Улуус бааһынай хаһаайыстыбалара биир сиргэ таба олорон бэрт. Хаар түстэ, сир бөһүйдэ диэн аахайбакка тоҥ сири тоҕута түһэннэр, биир күн иһигэр 105 күрүө баҕанатын туруоран хороттулар.
Хотуулаах үлэттэн хоннохторо аһыллан өссө да үлэлиэх дьону халлаан хараҥаран мэһэйдээтэ. Чапчылҕан нэһилиэгэр көтөрдөрү иитэр «Мэҥкэрэ» бааһынай хаһаайыстыбата (сал. Тимофей Григорьев) харамайдарын хаҥатар санааттан саҥа хотон тутан үлэлээн тилигирии сылдьар. Киниэхэ көмөлөһөр субуотунньукка ыҥырыыны ылынан Эмистэн Афанасий Бубякин, Амматтан Анна Алексеева, Бөтүҥтэн Пелагея Иванова кэллилэр. Итинник, бааһынайдар — биир үлэ үөһүгэр буһа-хата сылдьар киһилэрэ ыктаран ыгылыйан эрэр, кыайбакка кыланан эрэр диэтэллэр эрэ саба сүүрэн кэлэн көмөлөһөр идэлээхтэр. Көхтөөх үлэ көнтөһүн «бааһынайдар» хотун эдьиийдэрэ Александра Цыпандина тутар, субуотунньук хаамыытын иилиир-саҕалыыр. Кини салалтатынан бу үһүс субуотунньук тэрилиннэ. Саас сайылыкка көһүүгэ Мээндигигэ тиийэннэр Дмитрий Адамовы абыраабыттара, күһүн Сэргэ Бэскэ Александр Фомин хортуоскатын хостоһон дьоллообуттара.
