Саха Өрөспүүбүлүкэтин Ил Дархана Айсен Николаев хамсык дьаҥа тарҕаныытын сэрэтиигэ анаммыт Ыйааҕар олоҕуран, култуура, успуорт эйгэтин бары тэрилтэлэрэ санитарнай ирдэбили тутуһан үлэлииллэрин таһынан, бу тэрилтэлэргэ дьон QR — кодунан киирэллэрэ ирдэнэр буолла.
Манан сибээстээн, “Бүлүү» кинотеатрга эмиэ бу дьаһал олоххо киирдэ. Киинэ көрө кэлбит дьон булгуччу харыстанар мааскалаах буолуохтаахтар, вакцина ылбыттарын, инники COVID-19 ыалдьан үтүөрбүттэрин туоһулуур эбэтэр доруобуйаларын туругунан медотвод ылбыттарын туһунан ыспыраапкаларын уонна тус бэйэлэрин докумуоннарын каассаҕа көрдөрөн киирэллэр. Оскуола үөрэнээччилэрин төрөппүттэрэ арыаллыыллар.
Биһиги тэрилтэбит көрөөччү киэҥ эйгэтин хабаары араас сюжеттаах киинэлэри араас саастаах дьоҥҥо анаан көрдөрөр: кырачааннарбытыгар мультипликационнай киинэлэри, улахан дьоҥҥо анаан уус-уран, мелодрама, боевик, комедия
уо.д.а. Маны таһынан, араас омук киинэлэрин сакаастаан аҕалтарабыт. Бэйэбит оҥорон, «Сахафильм» уо.д.а. компаниялар устан таһаарбыт сахалыы киинэлэригэр дьон ордук сөбүлээн сылдьар.
Түмүккэ, күндү Бүлүү куоратын олохтоохторун, киинэни сөбүлээн көрөөччүлэри билиҥҥи кэм ирдэбилин тутуһан, доруобуйабыт туһугар биир санаанан тумсэн, чугас дьоммутун — сэргэбитин харыстыыр туһуттан баар ирдэбиллэри кытаанахтык тутуһуоххайыҥ диэн ыҥырабыт.