От ыйын 12-16 күннэригэр адаптивнай спорт көрүҥнэригэр “Дьулуур” XIV спартакиада буолаары турар. Манна биллэн туран биир сүрүн болҕомтоҕо киирэр боппуруоһунан спортсменнары эрэ буолбакка, кэлэр ыалдьыттары аһатааһын буолар. Бу тэрээһиҥҥэ улуус урбаанньыттара эмиэ бэлэмнэнэллэр.
“Буолаары турар спартакиадаҕа бэлэмнэнии чэрчитинэн ас атыылыыр, аһатар сирдээх урбаанньыттар санитарнай ирдэбиллэри тутуһууларыгар, уопсастыбаннай аһылыгы хааччыйар тэрилтэ үлэһиттэригэр анаан семинар ыыттыбыт.
Быйыл атыы-тутуу күрэхтэһиилэр ыытыллар сирдэригэр тэриллэрэ былааннанар. Ол курдук Аммаҕа стадион, элбэх функциялаах спортивнай саала, ону сэргэ Чапчылҕан уонна Бөтүҥ нэһилиэктэрин спортивнай саалаларын аттыларыгар тэриллиэ.
Ас атыылыыр баҕалаах киһи эрдэттэн “Мин биисинэһим” Киин салайааччыта Владимир Колосов аатыгар сайабылыанньа түһэриэхтээх. Ол кэнниттэн тэрийэр хамыһыйаҕа аккредитация ааһар. Манна санитарнай ирдэбиллэргэ олоҕуран улуус баһылыга илии баттааһыннаах балаһыанньа тахсыбыта.
Ол балаһыанньаҕа санитарнай ирдэбиллэр барыта киирэ сылдьаллар. Маны сэргэ ыһыахха атыылыан баҕалаах киһи Роспотребнадзор Амматааҕы салаатыгар кэлэн сайабылыанньа суруйуон наада. Бэйэтин кытта медицинскай киниискэтин уонна бородуукта хаачыстыбатын мэктиэлиир докумуоннарын илдьэ кэлэрэ ирдэнэр”, — диэн
Амма улууһун Роспотребнадзорун салайааччыта Айаллаана Романова сырдатта.