Биһиги улууспутугар дьону минньигэс аһынан хааччыйар сирдэр аҕыйаҕа суохтар. Хас биирдии урбаанньыт клиеннэри тардар туһуттан ас эгэлгэтин астыыр, саҥа меню оҥорор. Биллэн турар, тотоойу уонна минньигэс астаах кафеҕа дьон элбэхтик сылдьар. Киһи сөбүлээн сылдьар кафетынан улуус киинигэр турар «Апельсин» кафены ааттыахха сөп.

«Апельсин» кафе 2016 сыл атырдьах ыйыттан арыллан ситиһиилээхтик үлэлии турар. Хаһаайката Раиса Кириллина Тамалакаан нэһилиэгиттэн төрүттээх Үөһээ Бүлүү бөһүөлэгин олохтооҕо. Кэргэннээх,  үс оҕолоох. «Мин кырабыттан астыырбын олус сөбүлүүбүн. Ийэм 10 оҕолоох Дьоруой-ийэ Надежда Ивановна Бабаранова бэртээхэй асчыт этэ, кини Иннокентий Тарбаахапка үөрэммитэ. Ийэм батыһыннара сылдьан астыырга, араас албастарга үөрэппитэ».

Раиса Константиновна кэргэнинээн Евгений Валерьевичтыын сүбэлэһэн, толкуйдаан, ырытан баран улуус киинигэр турар дьиэни  атыыласпыттара. Бастаан утаа маҕаһыын арыйаары гынан баран, дьоҕус кафе арыйарга санаммыттара. Ас астыыр оборудованиелары, миэбэли атыыласпыттара, тэрилтэлэрин толору хааччыллыылаах оҥорбуттара. Кафе бастаан арылларыгар кэргэнэ Евгений Валерьевич өрөмүөннээбитэ, ититиитин, уотун-күөһүн бэйэтэ тардыбыта.

Күн бүгүн кафеҕа үс буолан сарсыарда аҕыстан киэһэ 6-ҕа диэри үлэлииллэр. Менюга итии аһылык киирэр, миин, торуой, лагман уо.д.а. Түргэн астан — шаурма, гамбургер. Кафе үгүс тэрилтэ таһыгар турар буолан, эбиэт кэмигэр дьон-сэргэ тоҥуоруһа мустар.

Маны таһынан, «Апельсин» кафе оҥолор төрөөбүт күннэрин, корпоративтары тэрийэр. Толору астаах мааны остуолу тэрийэн биэрэллэр, клиент баҕатынан тамада  үлэлэтэллэр.

Раиса Константиновна этэринэн: «Ас биисинэһэ элбэх сыраны эрэйэр, киирбит харчы утары бара турар. Киһи сатаан харчыны мунньубат биисинэһэ эбит диэн санааҕа кэллим. Араас кэм баар буолааччы… Кыахтааҕым буоллар дьиэбин кэҥэтиэм этэ, биитэр иккис этээстээн оҕо сынньанар сирин арыйыам этэ».

Ол эрээри, Раиса Константиновна сөбүлүүр дьарыгын үлэ оҥостубут, тэрийбит буолан, кини күн аайы үлэтигэр үөрэ-көтө кэлэр, ас астыырыттан олус дуоһуйар. «Сөбүлүүр дьарыккын идэ оҥостор, үлэ тэрийэр наһаа үчүгэй», — диэн санаатын этэр.

Үөһээ Бүлүү улууһугар предпринимателлэри ейүүр киин бэрэстэбиитэлэ Екатерина Васильева.