Амма улууһун мүөттээх ыҥырыаны иитээччилэрэ түбүктэрэ үксүүр. Күн бүгүн ыҥырыалары тарҕатааччы, наставник Марат Залялов Амур уобалаһыттан 165 уйаны аҕалла.
“Улууспутугар мүөттээх ыҥырыаны иитээччилэр сыллата үксүү тураллар. Ол курдук билигин улуус үрдүнэн 30-ча дьарыктанааччы баар. Бүгүн Марат Рафаилович Залялов 165 ыҥырыа уйатын аҕалан Мээндигигэ баар анал дьиэҕэ олохтоон, дьарыктанааччылар нэһилиэктэртэн кэлэн ыла сылдьаллар. Боруодата “среднерусскай” диэн. Манна кини олохтоох Татьяна Ивановна Яковлевалыын тэҥҥэ үлэлииллэр. Кинилэр саҥа дьарыктана сылдьааччыларга сүбэлэрэ элбэх. Барытын көрдөрөн, сүбэлээн биэрэллэр. Бэйэбит бөлөхтөөхпүт. Онно ыйыталаһан билсэ олоробут. Үтүө сайын буолан, элбэх мүөтү ылалларыгар баҕарабын”, — диэн этэр Амма улууһун мүөттээх ыҥырыанан дьарыктанааччылар Ассоциациаларын бэрэссэдээтэлэ Эльвира Пестерева.