Амматааҕы «Мин биисинэһим» өҥөнү оҥорор киин урбаанньыттарга уонна баҕалаахтарга «Бэйэ дьарыктаах буоларыгар бэлиэтэн» диэн онлайн семинары ыытта. Кыттыбыт дьон маннык туһалаах кэпсэтии ыытылла туралларыгар баҕа санааларын эттилэр.

Амматааҕы «Мин биисинэһим» өҥөнү оҥорор киин урбаанньыттарга уонна баҕалаахтарга «Бэйэ дьарыктаах буоларыгар бэлиэтэн» диэн онлайн семинары тэрийдэ. Туһалаах кэпсэтиини киин салайааччыта Владимир Колосов көҕүлээтэ.

Маҥнай «Бизнес инкубатор» дириэктэрэ Евгений Афанасьев уонна тэрилтэ кылаабынай исписэлииһэ Александра Николаева урбаанньыттарга, саҥа дьыаланы саҕалааччыларга тэрилтэ ыытар үлэтин – хамнаһын, ханнык өҥөнү, көмөнү оҥороллорун, туох усулуобуйаны тэрийэллэрин туһунан сиһилии билиһиннэрдилэр.

Амматааҕы нолуок сулууспатын исписэлииһэ Анастасия Давыдова нолуок саҥа эрэсиимин уратыларын, дьарыктаах буолуу быраабылаларын, ирдэбиллэрин туһунан кэпсээтэ.

Владимир Колосов дьарыктаах буолууга туһаайан бэйэтин сүбэлэрин биэрдэ, «Мин нолуогум» сыһыарыыны хайдах туһанары быһаарда. Түмүккэ семинар кыттыылаахтара хааччахтааһын кэмигэр маннык туһалаах семинардар куруук ыытылла туралларыгар баҕа санааларын эттилэр.

«Билиҥҥи туругунан улууска 499 чааһынай урбаанньыт баар. Ыарыынан ситимнээн хааччахтаммыт миэрэлэринэн, хомойуох иһин, элбэх урбаанньыт дьыалатын сабарыгар күһэлиннэ. Оттон 50 бэйэ дьарыктаах дьоммутугар парикмахердар, тыҥырах оҥорооччулар, туорт астааччылар, уһанааччылар, өрөмүөнү ыытааччылар, таксистар ахсааннара баһыйар.

Биһиги урбаанньыт буолуон баҕалаах дьоҥҥо бары өттүнэн көмөнү оҥоробут. Маҥнай кинилэри бэлиэтиибит, сүбэ-ама биэрэбит, сбербаҥҥа суоттарын арыйабыт, электроннай илии баттааһыннарын, биисинэс былааннарын оҥоробут, юрист, буҕаалтыр көмөтүн эмиэ туһаныахтарын сөп. Маны таһынан чэпчэтиилээх кирэдьиит, лизинг, микрозайм ылалларыгар көмөлөһөбүт. Онон бэйэтин дьыалатын арыйыан баҕалаах киһи биһиэхэ кэлэн биһиги босхо өҥөбүтүнэн туһанан урбаанньыт буолар толору кыахтанар», – диэн этэр Владимир Колосов.

Алтана Артемьева,

газета «Амма оло5о»

Владимир Колосов,

заведующий обособленным подразделением ГАУ РС(Я) Центр «Мой бизнес» в Амгинском улусе