Амматааҕы биисинэс-инкубатор өҥөтүнэн туһанан бэйэ дьыалатын саҕалааччылар улууска элбээн иһэллэр. Бу ыйга киин тэриллибитэ үс сылын туолар. Оттон «Мин биисинэһим» киин сбербаан Дьокуускайдааҕы салаатын «Высший пилотаж» анал аатын кыайыылааҕа буолан дипломунан наҕараадаланна.
Амматааҕы биисинэс-инкубатор тэриллибитэ бу ыйга үс сылын туолар. Дириэктэрдэринэн Татьяна Сутакова, Зинаида Александрова үлэлээбиттэрэ, билигин тэрилтэни Евгений Афанасьев салайар, кылаабынай исписэлиис Александра Николаева тэрилтэ үлэтин сүрүннүүр.
Оттон манна үлэлии олорор урбаан министиэристибэтин иһинэн баар «Мин биисинэһим» федеральнай бырайыак тэрилтэтин киинин салайааччыта Владимир Колосов элбэх урбаанньыты бэлиэтээн уонна биисинэс анал учуотун арыйан ааспыт сыл түмүгүнэн «Высший пилотаж» анал аатын кыайыылааҕа буолан дипломунан наҕараадаланна.

Биисинэс инкубаторга 9, тэйиччиттэн 5 резидент үлэлииллэр. Урбаанньыт буолбуттар манна үлэлиир усулуобуйалаах чэпчэтиилээх хоһунан хааччыллыахтарын, босхо сүбэни, бырайыактарыгар көмөнү туһаныахтарын, тэрээһиннэргэ сылдьыахтарын сөп. Ааспыт сылга 700 биирдиилээн дьоҥҥо сүбэ оҥоһулунна, 30-ча тэрээһиҥҥэ 600 киһи кытынна. Амма чэйэ, этэ, эт аһылыга, сакалаата, хонуу куруппааскытын сымыыта курдук бырайыактары көрдүлэр.

Билигин дьоҕус урбааны уонна туризмы сайыннарыыга анаммыт тус сыаллаах бырагыраамаларынан үлэлииллэр. «ArtFamily» (урбаанньыт Анна Иванова), «Beauty Day» (урбаанньыттар Олимпиада Гардашова, Татьяна Иванова), сервис киинэ (урбаанньыт Владимир Колосов) бу киинтэн тахсан айымньылаахтык үлэлииллэр.

Биисинэс-инкубатор дьиэтигэр билигин уопуттаах резидент Николай Апросимов иккис сылын сайтары, түргэн сыһыарыылары оҥорор, видеоконтеннары уонна анимационнай роликтары, араас хайысхаттан ол иһигэр үөһэттэн видео устуулары бэлэмниир.

«УМНИК-2020» Бүтүн Арассыыйатааҕы аныгы бырайыактар күрэхтэһиилэрин кыайыылааҕа, «Арассыыйа эдэр урбаанньыта-2020» Бүтүн Арассыыйатааҕы күрэхтэһии финалиһа буолар. Аны түргэн сыһыарыынан «NLU AYANA» көмөтүнэн нуучча тылыттан эбэҥки тылыгар тылбаасчыты бэлэмнии сылдьар. Эдэр киһи үлэни сөбүлээн оҥорор буоллахха хаһан баҕарар табыллар, онуоха олоххо уонна үлэҕэ чопчу сыал баар буолуохтаах диэн бигэ санаалаах.

Урбаанньыт Марфа Нестерова кэрэ аҥардарга хаастарын, уостарын, кыламаннарын оҥорор, визажист быһыытынан үлэлиир. Атаҕы ыраастааһын, атах тыҥыраҕын оҥоруутунан дьарыктанар маастар Елена Сысолятинаҕа наадыйааччы эмиэ элбэх. Сервис киинин үлэлэтэр Владислав Новиков суотабай төлөпүөнү, көмпүүтэри, ноутбугу оҥорор, программалары туруорар, вируһу эмтиир, судаарыстыбаннай өҥөлөргө учуокка туруорар, онтон да атын манна сыһыаннаах өҥөлөрү оҥорор.

Тэйиччиттэн олорон үлэлиир резиденнэр Чапчылҕантан Эльза Сдвижкова какаону, сакалааты, саахарынан кондитерскай оҥоһуктары бэлэмниир. Эльвира Пестерева сайыҥҥы өттүгэр Болугур нэһилиэгэр Күүлүпчү төрдүгэр турбазаны үлэлэтэр, мүөттээх ыҥырыаны иитэр.

Амматтан Артур Захаров сыбааркалыыр өҥөнү толорор, тимиртэн уус-уран оҥоһуктары бэлэмниир. Сатаҕайтан Айтал Неустроев мантан саҕалаан, билигин сайдан, хонуу куруппааскытын иитиитигэр киэҥник биллэр фермер буолла. Бу курдук үлэлиир урбаанньыттар нэһилиэктэр аайы элбээн иһэллэр.

«Тыа хаһаайыстыбатын салаатыгар Болугурга 21, ону таһынан Абаҕа, Сатаҕай, Бөтүҥ нэһилиэктэригэр үүт туттарааччы барыта 54 урбаанньыты сэтинньи, ахсынньы ыйдарга бэлиэтээтибит. Үүммүт саҥа сылга тыа хаһаайыстыбатыгар, дьону тиэйиигэ, тутуу маһын, ыраас ууну бэлэмнээһиҥҥэ, интэриниэт ситимин киллэриигэ, сыбааркалааһыҥҥа  сайаапкалар киирэннэр номнуо уон урбаанньыт Амматтан, Чапчылҕантан, Алтантан, Сатаҕайтан бэлиэтэннилэр. Сүүрбэччэ хонук иһигэр 100-чэкэ киһи босхо сүбэбитин туһанна, 2 онлайн тэрээһини ыыттыбыт. Бу күҥҥэ диэри 34 урбаанньыт сыыппаранан электроннай илии баттааһынын оҥортордо. Бэйэ дьыалатын хайа баҕарар хайысхаҕа тэриниэн баҕалаахтар биһиги өҥөбүтүнэн босхо туһанан урбаанньыт аатын ылыахтарын сөп», – диэн этэр «Мин биисинэһим» киин салайааччыта Владимир Колосов.

Подробнее: https://ulus.media/2021/01/21/ammataa-y-biisines-inkubator-t-nen-tu-anaachchy-elbiir/

Ааптар: Алтана Артемьева